मिथिंगा मुंनि सासे जोबोद निखावरि सुबुं दंमोन। गिबियाव बियो जेबो खामानि मावामोन, बिमा आरो बिफाया बिथांखौ गोबां रां खरसा खालामनानै बिखौ फोरोंदोंमोन। बियो गोसो होनानै फरायाखैमोन। बिमा आरो बिफाया हरनाय रांखौ बियो गावनि लोगोफोरजों बेरायनानै आरो फार्टि जानानै फोजोबदोंमोन। जोबथारनायाव बियो गावनि सोलोंथाइ जिउखौ नागारदोंमोन।
मिथिंगानि लोगोफोरा बिखौ सासेनि उनाव सासे नागारलांदोंमोन। बयबो गावसोरनि नखर सालायनायाव मुखुब जादोंमोन। रावबो रावखौबो खौरां लानो सम गैयै जादोंमोन।
मिथिंगानि बैसोआबो बारलांदोंमोन। गावनि बिमा आरो बिफाखौ नायफिननांगौनि सम फैदोंमोन। बेबादिनो बियो हाबा खालामदोंमोन। नाथाय बियो गावनि नखर सालायनायाव गोबां रांखान्थियारि जेंनायाव गोग्लैदोंमोन।
मोनफ्रोमबो जेंना, मोनफ्रोमबो गावनि आरो नखरनि सुबुंफोरनि गोनांथिनि थाखाय बियो जुजिनो गोनां जादोंमोन। नखराव सानफ्रोमबो गोदान गोदान आंखाल, जेंना आरो खैफोदफोर नुजाफैदोंमोन।
गामिनि माबा मोनसे रंजानाय फोरबो, समाजनि माबा मोनसे हाबाफारि, फिसाफोरनि गाननाय आरो फरायनायफोरनि थाखाय रां बुथुमनायाव बियो गावखौ मेंग्लिबाबो जिरायनो सम मोनाखैमोन।
सानसेखालि मिथिंगानि बिफाया जोबोद गोब्राब लोमजादोंमोन। रांखान्थियारि लोरबांनि थाखाय बियो गावनि बिफाखौ गेदेर देहाफाहामसालियाव लांनो हायाखिसै। बेबादिनो बिनि बिफाया थैनो गोनां जादोंमोन।
थैनायनि सिगां बिफाया बिखौ बुंदोंमोन, “गावनि रांखान्थियारि जिउखौ सांग्रांथियै लाखि। गावनि फिसाफोरखौबो बेबादिनो बोसोन हो। गोबां रां खामाय मानोना बुहुमा निखावरिफोरनि थाखाय जोबोद जेथो गोनां।”