मोनसे नोगोराव सासे बयनिख्रुइबो दोहोनिसिन मानसि दंमोन। बियो जोबोद अनसुला आरो गोनांथि जायोब्ला बिथाङा गुबुन मानसिफोरखौ मदद खालामोमोन।
सहरनि गोबां मानसिफोरा आंखाल आरो मददनि गोनां जायोब्ला बिथांनि खाथियाव फैयोमोन। बिथांनो गावसोरनि सिबिनाय आरो मान होनायखौ दिन्थियोमोन।
जिउआव बिथाङा गोबां गोरिब आरो निखावरि सुबुंफोरखौ लोगो मोनदोंमोन नाथाय बिसोरो दुखु आरो खस्थ’आ माबादि जायो बेखौ मोजाङै मोन्दांफेराखैमोन। बिथाङा दोहोनि जानानै माबादि मानसिफोरनि सनमान आरो सिबिनायखौ मोनो बेखौ मोजाङैनो बुजिनो हादोंमोन।
सानसेखालि बिथाङा सासे बिबायारिया जिउआव माबादि गुबुन मानसिफोरजों नेवसिजायो बेनि मोन्दांथिखौ लानो सानदोंमोन। बेबादिनो बिथाङा गुबुन रावनोबो खोनथाया जासेनो गस्ला गिजि आरो गामसा गिजि गाननानै, नखल दारि, नखल महर लानानै हरसे सहराव गिदिंबायनो हमदोंमोन।
जोबोद हर गेजेर, मानसिफोरा बिथांखौ रावबो रायदावलाङाखै, रावबो बिखौ बबेनि होनना सोङाखै, मानो एसेबां हर गेजेराव हारसिंनो थाबायगासिनो रावबो सोङाखै।
बिथाङा लामा गेजेरजों थाबायदोंमोन, गोबां मथर गारिफोरा बिथांखौ एरायनानै थांदोंमोन। मोनसे समाव बिथांनि खाथियाव गंसे मथर लाखिफैदोंमोन । सासे जौ फेनाय सेंग्राया ओंखारनानै बिथांखौ लावथिजों फंसे गोगोम बुनानै आरो बुंदोंमोन, “न’-बां गैजायै फाग्ला । नोंखौ बेवहायनो बुथारनानै गालांगोन आं। फाग्लाखायसो गबाय नोङो, नङाब्ला नोंखौ मथर एक्सिदेन खालामनानै बुथारलांगौमोन आं। गोरिब, फाग्ला आरो बिबायारि मानसि नुबाथाय आं नायनानै थानो हाया, बिसोरखौ बुथारनो गोसो जायो।”
बे मानसिया रावबो नङामोन, बिथांनिनो असे फिसाज्ला गेदेरमोन। गावनि फिसाज्लानि आखलादि एसेबां गाज्रि, फाग्ला आरो निखावरिफोरनि सायाव एसेबां मुगैनाय बेखौ बिथाङा बुजिनो हादोंमोन। बिथाङा सानदोंमोनदि, गासैबो मानसिफोरानो नोंखौ बुजिनो हाया बेनो जिउ।