सानसेखालि मासे जोबोद बोलोगोरा अलंबार मुंनि मैदेरा गावनि गासै लोगोफोरखौ लिंहरदोंमोन आरो बयनिबो सिगाङाव बुंदोंमोन, “लोगोफोर जों सोरनि मोदोमाव बांसिन बोलो दं बेखौ सुनायजाया होमबा?”
गुबुन मासे जोबोद बोलोगोरा आमोखा मुंनि मैदेरा बुंदोंमोन, “थारैनो जों बेखौ खेबसे आनजाद नायजायो। दे जों दिनै गावजोंगाव सुन्दायजों नायलायनाय गेलेदिनि।”
बे समाव सौब्ला मुंनि मैदेरा बुंफिनदोंमोन, “नङा जों गावजोंगाव नारलायनानै मानो दुखु होलायनो? बेबादि खालामोब्ला जों गावजोंगाव सुथुरसो जालायगोन। बेनिखायनो अरननि बिफांफोरखौनो सानसेनि गेजेराव सोर बेसेबां बुरजा बुखुनो हायो बेखौनो खालामनाया मोजांसिन जागोन ।”
बिथांनि बाथ्राखौ अखोरां मुंनि मैदेरा मोजां मोनाखिसै। बिथाङा गोथौयै सिन्था खालामनानै बुंदोंमोन, “अरननि बिफांफोरखौ बुखुयोब्ला अरनआ जोबस्रांलांगोन। अरनबारिया जोबलांबा जों बबेयाव थानो आरो माखौ जानो? बिफांफोरानो जोंनि जानाय आदारखौ सानफ्रोमबो जगार खालामनानै होगासिनो दं।”
नाथाय सौब्लाया मानियाखिसै। बिथांखौनो मदद होनानै बयबो बिफां बुखुनो हमनायसै। बेबादिनो अरननि बिफांफोरा जोबस्रांलांनायसै जावोनाव बिसोरो आदारनि जेंनाजों बुगिनांनायसै। बिसोरनि फिसाफोरा उखैनायजों सानफ्रोमबो मासेनि उनाव मासे थैनो हमनायसै। जायफारा फारि आदार नागिरनानै जेरैबो गावस्रालांनो हमनायसै।