गोजाननिफ्राय हाजोखौ नायनो समायना नुयो। हाजोनि मुंदांखाया बेल’ नङा, हाजोआदि गोजौ, गोगोम आरो गासै बिफां -लाइफां, जिब-जुनार आरो अन्थाइफोरखौ गावनि खर’आव दैखांनानै लादों आरो बयनिख्रुइबो गोजौसिन जादों बेनि थाखाय हाजोआ मुंदांखा।
बुहुमनि सानथ्रनो हायै गोमोथावफोरनि मादाव हाजोआबो मोनसे। बुहुमनि समायनाफोरनि मादाव हाजोआबो मोनसे समायनासिन सोरजि।
गुबुन गुबुन जिबिफोरा हाजोखौ मा रोखोमै बिजिरो बेखौ मा बुंनो, नाथाय मानसिफोरा हाजोनि सोमोन्दै गोबां रोखोमनि बिजिरनायखौ नुनो मोनो। हाजोनि गोनांथिया एसेल’ नङा, हाजोआदि जोंनो गोबांथार देहानि थाखाय आदार आरो मोजां आबहावा सोरजियो बेनि थाखाय हाजोआ गोजाम मुगानिफ्राय मानसिफोरजों सिबिजानायनि सनमानखौ मोनबोदों।
आथिखालाव हाजोआ सिबिजाग्राल’ माबा मोनसे गोहोल’ जानानै थायाखै। बेयो दिनैनि मुलुगाव मानसिफोरनि मोनसे गेलेग्रा थावनि, दावबायदिं मेरु आरो गामिसिम महर सोलायबोदों। जाय समाव मानसिफोरा हाजोखौ गियोमोन, दिनैनि समाव बैफोर गिनायखौ नागारनानै मानसिफोरा हाजोखौ गावनि झुमथिलि आरो गामि होनना आवग्रिना लानायखौ नुनो मोनो।
मानसिफोरा हाजोआव गाखोनो लुबैयो। गोब्राब हाजोखौ गाखोनानै दिनैनि समाव सासे मानसिया गावखौ मुंदांखा खालामनो हायो आरो गावनि बेसेन थांनानै थानायखौ गोगोम खालामनो हायो।
हाजोखौ गाखोनानै गावखौ गायसननो हानायखायनो आथिखालाव मानसिफोरा हाजोखौ गाखोनो थाखाय होंगो-दोंगो खालामो। गावनि मोननो गैयै जिउखौ हाजोनि मुङाव बाउसोमो। बिसोरनियाव माबा मोनसे मोननो लुबैनाय दं। बिसोरो गावसोरखौ गुबुनजों नायफिनजानो लुबैयो।
एसेल’ मानसिफोरा हाजोआव गाखोनानै बेनि सोरगिदिं आरो मानसिफोरखौ नायनो थाखाय गाखोयो। बिसोरो मानसिफोरखौ जिउआव गोजौ फारसे थांनांगौ बेखौ थुलुंगा होयो । गावनि मोननाय रोंगौथि आरो साहसखौ बिसोरो गुबुनफोरनो होनो नाजायो।
गोबाङानो मानसिफोरजों नायजानो थाखाय हाजो गाखोयो, एसेल’ मानसिफोरा नायनो थाखाय गाखोयो ।