मोनसे नखराव सानफ्रोमबो मासे फिथिगम हाबफैबाय थादोंमोन। बियो माब्लाबा दाउ बिदैखौ लोंनानै थांदोंमोन। माब्लाबा ओंखाम संग्रानि थोरसि आरो लथाफोरखौ सिफायलांदोंमोन।
सानसेखालि बे जिबौआ मासे दाउ बिमाजों दान्दिसे बुलायदोंमोन आरो दाउ बिमाखौ बुथारलांदोंमोन। नखरनि मानसिफोरा जिबौखौ गिनाय मोनदोंमोन । बबेखानि बिसोरो जिबौखौ बुथारनो गोसो जायाखैमोन।
सानसेखालि सहरनिफ्राय सासे जिबौ हमग्रा मानसि फैदोंमोन। बे समाव जिबौआ न’ सिङावनो हाबनानै दंमोन। जिबौ हमग्राया गोबां नागिरनायनि उनाव बेखौ लानजाइयाव हमनानै दिहुनदोंमोन आरो सिथ्लायाव जिबौजोंनो दान्दिसे गेलेदोंमोन।
जोबथारनायाव जिबौआ जोबोद मेंदोंमोन आरो लोरलाज्राब उन्दुनानै थादोंमोन। सासे जिबौ हमग्रा मानसिया मासे बिस गोनां जिबौखौ माबोरै आदुवा खालामनो हायो बेखौ नुनानै गामिनि मानसिफोरा सोमोनांदोंमोन। गामिनि बिथांखौ जोबोद सोलो गोरों होनना सानदोंमोन आरो बाखनायदोंमोन।
जेब्ला जिबौ हमग्रा मानसिया बेखौ मेंग्लिबाय सानना आखायजों हमो बे समावनो जिबौआ गोख्रों जानानै बिथांनि आखायाव गोख्रै सौनायसै। बिथाङा बागदावखांनायसै आरो आरो बेखौ लावथिजों बुनानै आदामारा खालामफिननायसै।
जिबौ हमग्रा मानसिया जिबौखौ बस्थायाव सोनानै मानसिफोरखौ बुंदोंमोन, “बिस गोनां जिबौजों गेलेजाया। बेयो मानसिफोरनि गोबां खहा खालामो। बेखौ मिथिनाया गाहामदि, माफ्रोमबो जिबौहानो अरनायनि आलादा आलादा आदब थायो। बेबादिनो मानसिफोरखौबो गोरलैयै फोथायनो नाङा। गोबां मानसिफोरहा थगायनाय आरो नंखाय बाथ्रा बुंनायनि गुबुन गुबुन सोलो थायो।”
जिबौ हमग्रा मानसिया जिबौ सौबाबो जाहाथे बिनि बिसआ जेबो खालामनो हाया बेनि थाखाय मुलि लाखादोंमोन। बिथाङा बेखौ लोंनानै रैखा मोननायसै।