सासे माहाजोन मानसि दंमोन। बिथांहा जेबो आंखाल गैयामोन। नाथाय जेब्लाबो बिथाङा गावखौनो गुबुनजों रुजुना नायनानै दुखु जायोमोन। बिथाङा गावनि गोजोननायनि आंखालखौ मोनदांदोंमोन।
बिथाङा गावनिख्रुइ माहाजोनसिन मानसि नुयोब्ला बिथांबादि जानो लुबैयोमोन। सोरनावबा मथर नुयोब्ला गावनियाव बेबादि मथर गैया होनना दुखु जायोमोन। सोरनावबा मैदेर नुयोब्ला बिथाङा गावनियावबो मैदेर थानायमोनबा जोबोद मोजां जागौमोन होनना सानोमोन।
सानसेखालि बिथाङा सासे आबादारि लोगो मोनदोंमोन। बिथाङा आबादारिनि मोखाङाव जोबोद खुसि आरो गोजोननाय नुदोंमोन।
बिथाङा आबादारिनि जोबोद गोसो होनानै खामानि मावबाय थानाय खाथियाव फैनानै सोंदोंमोन, “नोंथांनियाव बेसेबां बिघा हा दं? आरो नोंथांनि आरजिनाय रां थुबिलआ बेसेबां ?”
आबादारिया मिनिस्लु जानानै फिननाय होदोंमोन, “मानाव गेदेर, नोंथांनि नैथि सोंनायनि फिननाया गैया। आंनियाव खुनुरुखुम आबाद मावनानै जानो थाखाय थोजासेल’ हा दं।”
माहाजोन मानसिया बुंदोंमोन, “नोंहा थोब्ले -माब्ले दोहोनजों एसेबो आंखाल जायाना? बेजों नोंथाङा गावनि नखरखौ दैदेननो हायोना?”
आबादारिया मिनिस्लु मिनिनाय दिन्थिनानै बुंदोंमोन, “जा दं बेजोंनो खुसियै थानांगौ। बे बाथ्रायानो आंनि नखरखौ मोजाङै दैदेनगासिनो दं। मानसिनि आंखाला जेब्लाबो जोबनो थाङा। जायहा गोबां दोहोन थायो बिसोरनि आंखाल आरो जेंनाफोरा बांसिनसो जायो। जायहा लुबैनाय गैया बिसोरो जोबोद गोजोनै थानो हायो, नाथाय जाय जेसेबां लुबैयो बियो एसेबांनो गोजोननाय गैयै जायो।”
दोहोनि मानसिया हमदांनो हादोंमोनदि बिथांनि गोजोननाय गैयैनि गुबै जाहोनानो जादों लुबैनाय। बिथाङा बै साननिफ्राय गावनि लुबैनायखौ खम खालामनो नाजादोंमोन आरो बिथांनि जिउआव थार गोजोननाया जागायजेनदोंमोन।