मोनसे गामियाव सासे समाज सिबियारि सुबुं दंमोन। बियो मानसिफोरनि खैफोद- आफोद जेब्लाबो बाहागो लायोमोन। मानसिफोरनि जेंनाफोरखौ बियो बोस्रांना होनानै जोबोद गोजोननाय मोनोमोन। मानसिफोरा बिथांखौ गोबां समावनो दुखु होयोमोन नाथाय बिथाङा बेफोरखौ जेबोखौनो सानामोन। बियो गावनि दुखु-दाहा सिरियैनो गोबाना लानानै दावगालांबाय थादोंमोन।
गुबुन मोनसे गामियाव सासे सिखाव दंमोन। बियो मानसिफोरनि मुवाफोरखौ खावनानै जोबोद गोजोननाय मोनोमोन। बियो रावनिबो खैफोदाव बाहागो लायामोन। मानसिफोरखौ अननाय आरो हेफाजाब होनाया बिथांनि थाखाय गोनांथि नङामोन।
सिखावा जेब्लाबो समाज सिबियारि मानसिखौ नोजोर खालामबाय थायोमोन। बिथांनि दुखु आरो गावनि दुखु रुजुनानै नायदोंमोन। समाज सिबियारिनि नखराव जेबो जेंनायानो गैया, गावनि नखरावबो जेबो जेंना गैया, थेवब्लाबो समाज सिबियारि मानसिनाव मानो एसेबां दुखु बेखौ गोथौयै बियो सानदोंमोन।
सानसेखालि सिखावा समाज सिबियारि मानसिखौ लोगो हमनानै सोंदोंमोन, “नोंहा जेबो जेंनायानो गैया, आंहाबो जेंना गैया। आंनियाव जेबो दुखुआनो गैया, नाथाय नोंथांनिया मानो एसेबां दुखु?”
समाज सिबियारिया बुंदोंमोन, “मानसिया जेसेबांनो मोजां जायो एसेबांनो दुखु मोननो गोनां जायो। नोंथाङा खालि गावनिखौल’ सानो बेनिखायनो नोंहा दुखु गैया। आं गासै दुखुथिया मानसिफोरनि खोथाखौनो सानदों, बेनिखायनो आंनाव दुखु दं। नोंथाङा सोरनिबा खहा खालामनानै गोजोननाय मोनो, नाथाय सोरनिबा खहा जानायानो आंनि दुखु।”
सिखावा बुजिनो हादोंमोनदि, समाज सिबियारिनि गासैबो दुखु जानांनायनि जाहोनानो गाव। बै साननिफ्रायनो बिथाङा सिखाव खावनाय खामानिखौ नागारदोंमोन। बिथाङा मोजां जानो नाजादोंमोन आरो दुखु मोननांनायखौ अब्लानिफ्रायनो बियो बुजिनो हादोंमोन।