मोनसे समाव सानै सेंग्रा आरो सिख्लाया गंसे फरायसालिमायाव लोगो मोनलायनानै मोजां मोनलायलायदोंमोन। बिसोरो सानैजों फरायनाय जोबोब्लानो जुलि जागोन आरो सानैजों जायखिजाया थांनानै थानायनि राहा नागिरनानै मोनसे गोजोन नखर दानानै संसार जालांगोन होनना खोथा होलायदोंमोन।
समफोरा जोबोद मोजाङैनो बारग’लांदोंमोन। बिसोरो गावजोंगाव अननाय आरो हेफाजाब होलायनाय खालामदोंमोन। मोनसे समाव सानैनिबो फरायनाया जोबनायनि फारियाव फैदोंमोन।
सेंग्राया दाक्टार फरायनो थाखाय उथ्रिसार जानो हादोंमोन। बियो दाक्टार फरायनो गोसो। सानसेखालि गावनि मोजां मोननाय सिख्लाखौ लोगो हमनानै बुंदोंमोन, “अनजालि, नों आंखौ नेनो हागोनना हालिया? आं बा बोसोरनि थाखाय दाक्टार फरायनो थांसिगोन।”
सिख्लाया बुंदोंमोन, “रादाय होनायबादि जों जुलिखौनो लानोसै। बेनि उनाव नों दाक्टार फरायदो।”
सेंग्राया बुंदोंमोन, “नोंखौ जुलि लाग्रोयोबा आं जिउआव दाक्टार जानो हानाय नङा। जोंनि नखरा गोनां नङा। बबेखानि नोंसिनि नखराबो गोनां नङा। हाबानि उनाव गोबां नखरनि जेंना फैगोन आरो जों सानैनि जिउनि थांखिया जाफुंसार जानाय नङा।”
सिख्लाया गिबियावनो जुलिखौ बांसिन गोनांथि होदोंमोन। सेंग्राया गावनि दाक्टार जानायनि थांखिखौ जाफुंसार खालामनायखौ गिबियाव गोनांथि होदोंमोन।
सेंग्राया मा खालामबा साबसिन जागोन बेखौ गोथौयै सानदोंमोन। बियो सानदोंमोन, माखासे सोलायनाया दुखुनांथाव नाथाय गोनांथार। गुदि बा बोसोरखौ बियो नेनो हाया अब्ला बिखौ नागारनायनि खोथाखौनो सानदोंमोन।
सेंग्राया बुंदोंमोन, “नों आंखौ नेनो हालियाबा जों बेवहायनो नागारलायनाया गोनांसै। आं नोंखौ नागारनो गोसो गैयामोन, बेयो बेसेबांबा दुखुनांथाव नाथाय नागारनायाबो गोनांथार जानानै फैबाय।”