सासे गथ’आ गावसोरनि बारियाव फांसे सुमफ्राम बिफां गायदोंमोन। माखासे बोसोरनि उनाव बिफांनि दालाइयाव फिथाइ थाइनायसै। फिथाइया मोननाय समसिम गथ’आ नेनानै थाबाय थादोंमोन।
सानसेखालि गथ’आ बयनिख्रुइबो देरसिन आरो मोनहांनाय फिथाइखौ नुनानै जोबोद गोजोननाय मोनदोंमोन। बेखौ गावनो जागोन आरो रावनोबो होआ होनना सानदोंमोन। गुबुन फिथाइफोरखौसो बियो गावनि बिमा आरो बिफानो होगोन होनना सानदोंमोन।
बेलासि समाव खेबसेबाव नायनानै गथ’आ गोजोननाय मोनदोंमोन आरो अखानायै फुंनि समाव खादा लानानै गोमोन फिथाइफोरखौ खानो फैगोन होनना बियो थांखि लादोंमोन।
अखानायै बेरेफुंजानि गथ’आ सुमफ्राम फिथाइखौ खानो दावगाबोदोंमोन। बियो बिफांनि दालाइयाव गोमोन फिथाइफोरखौ नुनानै जोबोद गोजोननाय मोनदोंमोन नाथाय जाय फिथाइखौ बियो जानो होनना सानदोंमोन बेखौ मासे दाउलुर जाख्लाबनानै बिरलांनाय नुनानै बियो दुखु मोनदोंमोन।
फिथाइखौ दाउलुरआ गुबुन फांसे बिफांनि दालाइयाव बानानै दंमोन। गथ’आ रागा जोंनानै बिखौ अन्थाइजों खुबैनानै हायाव जल्दब खोख्लैनायसै।
गथ’आ जोखोम जानाय दाउलुरखौ आखायाव दैखांना लानानै बुंबाय, “आंनि सुमफ्राम फिथाइखौ नोङो मानो जाखो? नोंथ’ सिखावसो।”
दाउलुरआ बुंबाय, “अननानै आंखौ निमाहा होदो । आंनि उखैनाया बारा जानायलाय आं सुमफ्राम फिथाइखौ जादोंमोन। आं सिखाव नङा। मिथिंगानि बिखायाव गासै बिफांनि फिथाइखौनो जानानै थांनानै थानो थाखाय जोंनि आबै आरो आबौमोनहा फोरोंलांदोंमोन।”
गथ’आ बुंदोंमोन, “नोंसोरो हाग्रायाव थांनानै गोसोबादि जाहैयोबा माथो जायो? बे सुमफ्राम बिफाङादि आं गायनाय बेनि गासैबो मोनथाइ आरो बिगोमायादि आंसो।”
दाउलुरआ खैफोदाव गोग्लैनाय मोनदोंमोन। बियो जिउआव जोबोद गेदेर गोरोन्थि खालामनाय मोनदोंमोन। बे गोरोन्थिनि थाखाय दाउलुरआ निमाहा बिनानै गावनि गासै लोगोफोरखौ लानानै गोजानाव बिरलांदोंमोन।
माखासे साननि उनाव सुमफ्राम फिथाइफोरा मोनफ्रुजोबदोंमोन। बेखौ रावबो जायाखैमोन। ओरैनो मोननानै हायाव सिरिनानै थादोंमोन। गेसाव मोनामनाय गोसारदोंमोन। बे समाव गथ’साया दाउलुरखौ गोसोखांफिनदोंमोन। बियो सानदोंमोनदि दाउलुरफोरा थानायमोनबा सुमफ्राम फिथाइफोरखौ जानानै जोबोद गोजोननाय मोनगौमोन।