सासे अफिसारआ गावनि मावनांगौ खामानिखौ सम सम जोबोद मावनो बायोमोन। बियो माब्लाबा माब्लाबा गोबाव सानहालागै गावनि मावख’आव फैया लासेनो थायोमोन। मानसिफोरा बिथांखौ नेनानैनो मेंग्लिलायोमोन। गोबां मानसिफोरा बिथांखौ सानसेथारला नेनानैबो मोनामोन आरो ओरैनो न’ फारसे गिदिंलांफिननो गोनां जायोमोन।
अफिसारनि मावख’आव सासे जोबोद मावथि दाखोर सिबग्रा बोरायसा दंमोन। बियो सानफ्रोमबो थिग समावनो मावख’आव सफैयोमोन आरो साब-सिखोन खालामोमोन।
सानसेखालि अफिसारआ दाखोर सिबग्रा बोरायसा मानसिखौ सोंदोंमोन, “नोंथाङा सानफ्रोमबो बयनिख्रुइबो सिगांसिन सफैयो। सानफ्रोमबो मावख’खौ साब-सिखोन खालामो। नोंथाङा एसेबो बानाय मोना नामा?”
बोरायसाया फिननाय होदोंमोन, “जाय खामानिखौ आं मावखानांगौ बेखौ बानानै थानायनि मा बाथ्रा दं? बे खामानिखौनो आं मावनो होननानै रोजा रोजा मानसिफोरनि गेजेराव बादायलायनानै मोनदों।”
अफिसारआ बुंदोंमोन, “आं नाथाय आंनि बिबानखौनो सम सम मावनो जोबोद बायो। आंनि मावनांगौ बिबाना एसेबां गिलिर एखमब्ला सानना आगोरमोना।”
बोरायसा मानसिया बुंदोंमोन, “गावनि सुन्दायनि लिरथाइखौ अजद होग्रा जेरावबो मैदेर गैया । गावनि मावनांगौ बिबानखौ लानानै मावलांबाय थानायानो मोजां। मावनो हायाब्ला गुबुननि समखौ नोस्थोबो खालामनो नाङा।”