मोनसे अरनबारियाव मासे मोख्रा दंमोन। बियो बिफां गाखोनाय आरो दालाइ बारस्लायनायाव जोबोद आखा-फाखामोन।
अरनबारिनि गासैबो जुनारफोरानो बिखौ सोमोनांनो गोनां जायोमोन। दंफां सायाव गाखोग्रा मानदाब, जिबौ, लख्रा, लामा खान्दाय, मोफौ, सिलौरा, बेमा आरो जे सोंग्रा माख्रायाबो बिनि रोंगौथिखौ नुनानै सोमोनांदोंमोन।
सानसेखालि मोख्राया अरननि गासै जुनारफोरखौनो लिंहरदोंमोन आरो गावजों बिफां गाखोनानै बिफांनि दालाइयाव बारस्लायनायनि बादायलायनो थाखाय खावलायदोंमोन। नाथाय बिजों रावबो बादायलायनो थाखाय दावगाबोआखैमोन।
मोख्राया गाव हारसिंनो बादायलायनो थाखाय जुजिदोंमोन। बयबो बिखौ गोसो होनानै नायदोंमोन। बियो फांसे जोबोद गेदेर बिफांखौ गाखोदोंमोन आरो बेनि दालाइ मोनफ्रोमबो बारस्लायदोंमोन। मोनसे समाव मोख्राया बोरैबा दालाइयाव हमलुनदोंमोन आरो हायाव जल्दब गोग्लैदोंमोन। मोख्राया गोब्राब दुखु मोननो गोनां जादोंमोन।
बे समाव मानै बिसि -फिसाय दाउथुआ गावजोंगाव मोखांजों-मोखां नायलायदोंमोन। बिसोरो माखासे समनिफ्रायनो मोनसे गोरोन्थिनि थाखाय गावजोंगाव बोराबलायनानै दंमोन। गोबाव समसिम बिसोरो गावजोंगाव रायज्लायाखैमोन।
बोराय दाउथुआ बिसिनि मोखांआव नायनानै बुंदोंमोन, “बिफां गाखोनाय आरो दालाइयाव बारस्लायनायाव मोख्राया जोबोद आखा-फाखा । नाथाय मोख्रायाबो माब्लाबा बिफांनिफ्राय गोग्लैयो । नोंजों बोराबजानायनि जाहोना आंहाबो बेबादिनो जादोंमोन।”