मोनसे सहराव साब्रै सिखाव दंमोन। बिसोरो गावजोंगाव जोबोद फोथायलायोमोन। जोबोद अनज्लायोमोन। माखासे नेमखान्थिनि गेजेरजों बिसोरो जेब्लाबो सिखाव खावनायखौ जागायजेनोमोन।
1.सिखाव खावनायनि उनाव खेबसे ज’ लोगो हमलायफिननाय।
2.सोर मा खावनानै लाबोदों बेखौ दिन्थिनाय।
3.समानै राननानै लाज्लायनाय।
3.जेखि खावनानै लाबोआ मानो बेखौ रावबो हारसिं लाखोमानो मोना।
बेबादिनो गावसोरनि सिखाव खावनाय खामानिखौ जौगाहोनो आरो लाखिलांबाय थानो थाखाय माखासे नेमखान्थिफोर बिसोरो बानायबावदोंमोन।
1.गावजोंगाव माब्लाबाबो थगायलायनो मोना।
2.सोरबा जुदि खैफोदाव गोग्लैयो अब्ला बिखौ मदद होनांगौ।
3.सोरबा जुदि सोरजोंबा हमजायो अब्ला गावसोरनि हानजायाव सा बेसे दं आरो बहा बहा थायो बेखौ खोन्थालायनो मोना।
सानसेखालि बिसोरो गंसे सहराव फुजानि रंजानाय समाव सिखाव खावनो ओंखारलांदोंमोन। बिसोरो साफा फारफा जानानै जा मोनो खावनो थाखाय नाजादोंमोन। बे समावनो सासे सिखावा हमजानायसै। बिनि हमजानायखौ गुबुन लोगोफोराबो नुदोंमोन। नाथाय बिसोरो बिखौ रैखा खालामनो हायाखिसै। बिसोरो स्रोद स्रोद खारखोमालांदोंमोन।
हमजानाय सिखावखौ गोख्रों साजा होनाय जादोंमोन। सोंदोंमोन बिथांजों लोगोसे सा बेसे सिखावफोर दंबावनो। नाथाय बियो जेबो खोन्थायाखैमोन। मानसिफोरा बिखौ हाजासे बुदोंमोन आरो जोबथारनायाव फुलिसनो गथायदोंमोन। फुलिसआ बिखौ जोबथेसालियाव दोनदोंमोन।
गोबां बोसोरनि उनाव बियो जोबथेसालिनिफ्राय गबोदोंमोन। बे समाव बिनि लोगोफोरा सिखाव खावनाय खामानिखौ नागारबायमोन। खौरांखौ मोननानै लोगोफोरा बिखौ नायनो फैदोंमोन।
सासे लोगोआ बुंदोंमोन, “नोंथांनिसिम रोजा रोजा साबायखर थाबाय। जों नोंथांखौ बै समाव रैखा खालामनांगौबाबो रैखा खालामनो हायाखैमोन, नाथाय नोंथाङा जोंखौ रैखा खालामबाय। नोंनिख्रुइ साबसिन लोगो जिउआव जों नागिरनानै मोनाखिसै। जों दा सिखाव खावनाय खामानिखौ नागारबाय। नोंबो दानिया नागारनांसिगोन। गोजाम हुदाफोरखौ नागारनानै जों गोदान हुदा बानायनानै लानो हायो।”
बिसोरो गावजोंगाव मिनिस्लु जादोंमोन। थांना थानायनि थाखाय मा मावनानै जागोन बेनि बागै सावरायलायदोंमोन। बिसोरो मोनसे थि थांखियाव फैनो हादोंमोन आरो गोदान सिमां सुजुदोंमोन। बिसोरो सिखाव खावनानै माब्लाबानो गोबां दोहोन आरजिबायमोन। बेफोर रांखौ बिसोरो फालांगि खालामनायनि थाखाय बाहायनो सिन्था खालामदोंमोन आरो नोगोराव गंसे गेदेर गला होदोंमोन। गलानिफ्रायनो बिसोरनि गोबां आरजिनाया फैनायसै। बे गलानि थाखाय गोबां मावदांफोरा खामानि मावनो हांखुर जानायसै। बायग्राफोराबो बे गलानि फारसे जेब्लाबो गोसो बोगथाबजानायसै।