सासे बोराया मोनसे गेदेर अरननि खाथियाव थारुन आबाद खालामदोंमोन। माखासे साननि उनाव थारुन आबादा मोजां जाबोदोंमोन। हाग्रानि अमाफोरा थारुनखौ नोजोर होबाय थादोंमोन। जेब्ला थारुना बेदर थाङो अब्लानो बिसोरो बेखौ जानायनि खोथा सानबाय थादोंमोन।
सानसेखालि हाग्रानि अमाया फैनानै बोरायनि थारुनखौ जानायसै। बेबादिनो बिसोरो गले गले हरनि समाव जाफैबाय थानायसै। बोराया जेबो खालामैखाय बिसोरो सानदोंमोनदि बोराया थारुनखौ गावसोरनि थाखायनो गायदोंमोन।
नाथाय बोराया हाग्रानि अमाफोरनि सायाव रागा जोंनाया बांसिननिख्रुइ बांसिन जाबायमोन। बियो गावनि गोसोखौ हमथानानै थानो हायै जादोंमोन बेनिखायनो बियो गंसे सिलाय बानायबाय थादोंमोन।
सानसेखालि हर गेजेराव बोराया सिलाय लानानै गावनि थारुन गायनाय जायगायाव फैदोंमोन। बियो नुनो मोनदोंमोनदि हाग्रानि अमाफोरा गावसोरनि गोसोबादि गेलेगासिनो दंमोन।
बोराया अमानि फारसे गुलि गावहरदोंमोन आरो मासे बेसेबांबा गेदेर अमाया नांजादोंमोन। बियो जोबोद गोसा सोदोब होनानै गाबख्रावदोंमोन आरो बिनि गासै लोगोफोरानो गिनानै खारलांदोंमोन।
उननि बोसोराव आरोबाव बोराया थारुन आबाद खालामबावदोंमोन। आबादनि सोरगिदिं बेरा होदोंमोन जेराव गोजा गाब फुननानै दोननाय जादोंमोन। थारुन आबादा जोबोद मोजां जादोंमोन नाथाय सिगांनि खोथाखौ साननानै हाग्रानि अमाया रावबो बेखौ जानो थाखाय फैयाखैमोन। बिसोरो बेरायाव गोजा गाब फुननानै दोननायखौ नुनानै सानदोंमोनदि बे थारुन बागाननि सिङाव हाबनाया खैफोद गोनां।