सानसेखालि सासे फरायसाया लामा सेराव थानाय फांसे बिफां सेराव जिरायनानै दुखु जाबाय थादोंमोन। बियो लामाखौ दान्दिसे सिगां फारसे नायहरदोंमोन, आरो दान्दिसे उन फारसे नायहरदोंमोन।
बियो बायदिसिना खोथा सानदोंमोन। गावनि जिउनि जेननाय आरो देरहानायनि खोथा बियो सानदोंमोन। आरोबाव सिगांथिं थांनो ना उनथिं गिदिंलांफिननो बियो थि खालामनो हायाखैमोन।
बिथांनि खाथियाव सासे गियानि मानसिया दान्दिसे जिरायफैदोंमोन आरो बुंदोंमोन, “लामा हान्थिनाय समाव बेबादि दान्दिसे बिफां सिङाव जिरायनो मोनोब्ला जोबोद गोजोननाय मोनो। गोदान आगान सुरफिननो आरो गोजानसिम थांनो थाखाय गोहो मोनो।”
बिथांनि मोखाङाव नायनानै फरायसाया सोंदोंमोन, “नोंथाङा हारसिं नामा? हारसिङै गोजान हान्थिलांनाया गोरलै नामा?”
गियानि मानसिया बुंबाय, “हारसिङै गोजान थांनांगौआ गोरलै होनना सोर बुंनो हानो? नाथाय दावगालांबाय थायोब्ला सानसे सहैथारगोन। नोंथाङा बहा थांगोन?”
फरायसाया बुंबाय, “आं गावखौ दासिमबो थिग खालामनो हायाखै बबेथिंजाय थांनो। सिगांथिं थांनांगौ ना उनथिं थांफिननांगौ। आंनि गोसोआ जोबोद लोरबां। आंनि लोगोफोरा आंखौ गारनानै थांबाय। दानिया आंखौ थुलुंगा होग्राबो गैया आरो मदद होग्राबो गैया। आं जा सिमां नुदोंमोन बेयो दा गोमालांबाय। आं उनथिं थांफिननो सानदोंमोन नाथाय मानसिफोरा आंखौ लोरबां होनना मुं सुगोन, बेनिखायनो आं बेवहायनो जिरायनानै थाबाय थादों।”
गियानि मानसिया बिनि मोखाङाव नायनानै मिनिस्लु जादोंमोन। बिथाङा बुंदोंमोन, “सिमांफोरा गोमालाङो। थांखिया सोलायो । सोरबा नोंखौ नागारलांगोन। माखासे बुब्लिफोरा गोमालांगोन। नाथाय नों नोंनि मुंखौ दासोलाय। नोंनि मुङा जाहाथे साबसिन जायो बेनि थाखाय खामानि माव।”