सानसेखालि सासे फालांगिरि सुबुङा सासे दोहोरोम गुरुनि खाथियाव फैदोंमोन। दोहोरोम गुरुआ जोबोद गोसो खुसि आरो आरामैनो दंमोन। बियो रावजोंबो नांज्लाय-खमज्लाय गैयै गावनि गोलाव जिउखौ बारहोबोदोंमोन आरो बेफोर गासैबो बाथ्राफोरखौनो फालांगिरिया मिथिगौमोन।
फालांगिरिया दोहोरोम गुरुखौ खुलुमनाय होनानै सोंदोंमोन, “बाबा, दासान्दि आंनि जिउआव दावराव-दावसि जोबनो गैया। आंनि सुथुर आरो आंनि लोगो सानफ्रोमबो आं बिसोरजों बाथ्रा दानथेलायनो गोनां जायो। आंनि बिसि आरो फिसाफोराबो जेब्लाबो माबा मोनसे मुवा आरो बेसादफोरखौनो लानानै बोराबनाय खुद्रिनाय दिन्थिबाय थायो। फालांगि खालामनानै आं गोबां रां आरजिबाय, दोहोनि जाबाय, आंनि जिउआव आंखाल गैया। नाथाय थेवब्लाबो आंनि जिउआव मानो दावराव-दावसि?”
दोहोरोम गुरुआ बुंदोंमोन, “जाय दोहोन आरजियो बियो दुखु, दाहा, खस्थ’, जेंना , सुथुर आरो लोगो गासैखौबो आरजिनो गोनां जायो। नों जाय खामानिखौ मावगासिनो दं बेवहाय दावराव-दावसियाबो दंखायो।”
फालांगिरिया सोंबावदोंमोन, “आं जोबोद गोजोनै थानो लुबैबाय, नाथाय माबोरै गोजोनै थानो हागोन बेनि सोलोखौ आंनो होदो।”
दोहोरोम गुरुआ सोंफिनदोंमोन, “नोङो गावनि गासै दोहोन सम्फथिखौ नागारनानै आंबादि जानो हागोनना?”
फालांगिरिया बुंदोंमोन, “आं जोबोद खस्थ’जों आरजिनाय दोहोन सम्फथिखौ माबोरै नागारनो हानो बाबा? बेनि अनगायै गुबुन राहा गैया नामा?”
दोहोरोम गुरुआ बुंदोंमोन, “जेरैबो गोजोनै थानो हायो, नाथाय सहायनो हानांगोन।”
फालांगिरिया बुंबाय, “नाथाय आंनि दावराव-दावसिया माब्ला जोबगोन?”
दोहोरोम गुरुआ बुंफिनदोंमोन, “सानसे जिउनि दावराव-दावसिया जोबगोन। बै समाव नोंनि दुखु, दाहा, गाबनाय, मिनिनाय, जेननाय, देरहानाय, उखैनाय आरो लुबैनाय जेबो थानाय नङा।”