अरननि राजा सिंहआ बोरायबायमोन। बिहा साथाम फिसाज्लाफोर दंमोन। राजा जानांगौबा गिबि फिसाज्लाया मोनथाइया बांसिन, नाथाय बियो जोबोद अलसियामोन। बियो राजा जानो गोसो गैया। नैथि फिसाज्लाया आथिं आरो आखाय गासैबो लेंग्रा। थामथि फिसाज्लायाबो खाना।
सानसेखालि राजाया फिसाज्लाफोरखौ लिंहरनानै सोंदोंमोन, “देनाय बुंनायसाय, नोंसोरनि गेजेराव सोर राजा जानो थाखाय बांसिन गोसो? जायनो बांसिन गोसो बिखौनो आं राजा खालामनोसै।”
फिसाज्ला गेदेरा बुंदोंमोन, “आंहा गोसो गैया।”
नैथि फिसाज्लाया बुंदोंमोन, “आंनि आखाय आरो आथिं फारनैबो लेंग्रा बेनिखायनो आं जानो हाया।”
थामथि फिसाज्लाया बुंदोंमोन, “आंनि मेगनानो थाइनैबो खाना। बयखौबो आं समानै नायनो हानाय नङा।”
सिंह राजाया गेदेर खैफोदाव गोग्लैनाय बादि मोनदोंमोन। बियो सानदों गुबुन जुनारफोराबो राजा जानो हागोन। बियो अरननि गासै जुनारफोरखौनो लिंहरनानै बुंदोंमोन, “आंनि फिसाफोरा रावबो राजा जानो गोसो गैया। दानिया आं सोरखौ राजा खालामबावनांगौ जाखो। दे बेनि राहाखौ सोरबा बुंनो हागोनना?”
बाथ्राखौ खोनानानै माफ्रोमबो जुनारफोरानो अरननि राजा जानो गोसो जादोंमोन। बयबो गावसोरनि साननायखौ फोरमायनो सानदोंमोन नाथाय रावहाबो साहस जायाखैमोन। सोरदि मा बुंगोन बेखौ साननानै, लाजिनांगोन, सोरबा मदद होनाय नङा, सोरबा मेगन सागोन, सोरबाया मिनिगोन साननानै गासैबो सिरियैनो थादोंमोन। बयबो फंसेल’ बाथ्रा बुंदोंमोन, “महाराजा नोंथाङा जा खालामो बेनो जागोन।”
सिंहआ बुजिदोंमोन, “बिसोरहा गिनाय दं, आरो बे गिनायानो बिसोरनि साननायखौ जाफुंहोआखिसै। गिनाय थायोब्ला रावनिबो साननाया माब्लाबाबो जाफुङा। जाय बाथ्राखौ बुंनो थाखाय बिसोरो दावगाबोदोंमोन, बे बाथ्राखौ लानानै बिसोरो थांफिनदोंमोन।”