गासैबो जाफुंसार जानाया आब्रुथिनि सायावनो सोनारो

मुलुगसोलोंसालिनि फरायनायखौ फोजोबनायनि उनाव सासे फरायसाया गावनि गोदोनि गुदि फरायसालिनि फोरोंगिरिनि खाथियाव फैदोंमोन। बियो गावनि फोरोंगिरिखौ खुलुमदोंमोन। गोबां बोसोरनि उनाव गावनि फरायसाखौ नुनानै फोरोंगिरिया जोबोद गोजोननाय मोनदोंमोन।

फोरोंगिरिया फरायसाखौ बुंदोंमोन, “दानिया बुंदो, आंनि खाथियाव फैफिननायनि जाहोना मा?”

फरायसाया मिनिस्लु जानानै फिननाय होदोंमोन, “आं दिनैसो आंनि मुलुगसोलोंसालिनि जोबथा आनजादनि फिथाइखौ मोननो हादों। आनजादाव आं बयनिख्रुइबो साबसिनै उथ्रिनो हादों। बेनिखायनो आं गोदो नोंथाङा बुंहरनाय बाथ्राखौ गोसोखांनानै नोंथांनि खाथियाव फैदों।”

फोरोंगिरिया गोसोखांनो हायाखैमोन। बियो सोंफिनदोंमोन, “आं मा बुंदोंमोन आंहा गोसोआव गैलिया।”

फरायसाया बुंदोंमोन, “सार बुंदोंमोन, गासैबो जाफुंसार जानाया आब्रुथिनि सायावनो सोनारो। आं आंनि आब्रुथिखौ लाखिनानै फरायदोंमोन आरो बेबादिनो सोलोंथाइयारि जाफुंसार जानायखौ मोननो हादों।”

फोरोंगिरिया जोबोद खुसि जादोंमोन आरो सोंबावदोंमोन, “बुंनायसाय, नोङो मा मा आब्रुथिनि बाथ्रा बुंदों।”

फरायसाया गावनि फोरोंगिरिनि सोंनायनि फिननाय होदोंमोन, “आं जेब्लाबो गोसो होनानै फरायदोंमोन। माब्लाबाबो फरायनो बानाय आरो सोलोंथाइखौ नागारनो साननायखौ गोसोनिफ्राय नागारदोंमोन। आं आंनि फरायनाय समखौ माब्लाबाबो नेवसिगाराखैमोन। उथ्रिनो थाखाय आं जेब्लाबो गेदेर थिरांथा खालामदोंमोन। आं गावखौनो गले गले खावलायदोंमोन आरो आर’ज खालामबाय थादोंमोन जाहाथे आं गोसो होनानै फरायो।”