मोनसे जायगायाव सासे गारि सिखाव दंमोन। बियो माब्लाबा हरसेनि गेजेरावनो गोबांथार गारि खावदोंमोन। बिथाङा सिखाव खावनानै गावनि जिउखौ दैदेनदोंमोन। सिखाव खावनानै मोननाय दोहोना बिथांखौ जोंगा-मागा आरो आंखाल गैयै खालामदोंमोन।
सानसेखालि सिखावखौ फुलिसआ हमनानै थानायाव लाबोदोंमोन। बिखौ गोबां साजा होनानै फुलिसफोरा सोंदोंमोन, “सिखाव खावनानै नोङो बेसेबां दोहोन आरजिनो हाखो बुंनो हागोनना?”
सिखावा फिननाय होदोंमोन, “आंनि मोदोमाव थानाय गासै फेन गस्ला आरो आंनि न’-बां, बागान आरो मुवा-बेसादफोर गासैबो सिखाव खावनानै आरजिनाय। आरो आंनि सासे फिसाजोआ दा दाक्टार फरायगासिनो दं, बिबो आंनि सिखाव खावनायनि रांजोंनो फरायगासिनो दं।”
फुलिसआ बुंदोंमोन, “नोङो लाजिनाय मोनासै नामादि सासे दाक्टार फरायनाय फिसाजो थालायनानैबो सिखाव खावनो?”
सिखावा बुंफिनदोंमोन, “बेयो आंनि जोबोद गेदेर गोरोन्थि। आंनि फिसाजोखौ निमाहा हो।”
फुलिसआ बुंदोंमोन, “सिखाव खावनायनि थाखाय नोंखौ जेलाव सोनानै दोननाय जासिगोन।”
सिखावा खुसियैनो बुंदोंमोन, “मोनफ्रोमबो हाबा मावनायनि जाखिजाया गाज्रि एबा मोजां मोनसे फिथाइखौ मोनखागोन। आं सिखाव खावनायनि साजाखौ मोनबाय। नाथाय आंनि फिसाजोआ दाक्टार फरायनानै दाक्टार जानायनि मोन्थाइखौ मोननांगोन। नोंथांमोनहा बेनि सायाव जेबो दाय हमनो मोननाय नङा। बियो आंखौ दिनैसिम सिखाव होनना जेबोखौनो मिथिया।।”