सासे फोरोंगिरिया थाखो खथायाव गासै फरायसाफोरखौनो जिउआव मा जागोन बेनि सायाव सोंथि खालामदोंमोन। साफ्रोमबो फरायसाफोरा गावसोरनि थांखिखौ फोरमायदोंमोन। बिसोरनि गेजेरावनो सासे फरायसाया गावनि फिननायखौ होआलासेनो थादोंमोन।
फरायसानि साननायाव गोबां गुलाय-गुजाय जानानै दंमोन। बेनिखायनो रोखा फिननाय होनो हायाखै। माबादि फिननाय होयोब्ला गाहाम जागोन बेखौनो बियो थिग खालामनो हायाखै।
फोरोंगिरिया फिन खेबसेबाव फरायसानियाव सोंदोंमोन, “गासैबो गाव गावनि थांखिखौ फोरमायबाय, नाथाय दासिम नोङो गावनि थांखिखौ फोरमायाखिसै। नोङो जिउआव मा जानो लुबैदों बेखौ फोरमायदो।”
जोबथारनायाव फरायसाया फिननाय होदोंमोन, “सार, इसोरा आंनि खाफालाव मा लिरना हरदों बेखौ आं मिथिया। मानसिफोराथ’ बुङो, इसोरा जा खालामो बेनो जायो। आंखौबा इसोरा मा खालामो बेनि सायावनो आंबो लामा नायनानै दं। जिउआव इसोरा आंखौ जा खालामो बेनो जागोन।”
फोरोंगिरिया बुंदोंमोन, “मानसिफोरा अबंलावरिनि गोबां बाथ्रा बुङो। इसोरा जोंखौ सोरजियो, बुहुमाव थांनानै थानो जायगा होयो आरो लांफिनोल’सो। थांनानै थासान्दि नों मा जानानै थांनानै थागोन बेनि राहाखौ गावनो बानायनानै लानांगौ। जिउआव नों मा जागोन बेबादि जेबो लिरखानाय गैया। नों मा जानो सानदों बेखौ नों गावनो बानायनानै लानांगोन। थांखिया सासे मानसिखौ इयुनाव मा जागोन बेखौ थिग खालामो।”