सासे मानसिया बिदुं दुंखावनायनि थाखाय न’ सिङाव थानो हायाखैमोन। बिथाङा बहा थागोन जादोंमोन आरो बेबादि समावनो बियो गंसे दैसा गाथोनाव थांनानै दुगैहैनायनि खोथा सानदोंमोन।
जेब्ला बिथाङा दुगैनो थाखाय गाथोनाव हाबो अब्ला बिथाङा दैखौबो गुदुं जानाय मोनदोंमोन। दैया माबोरै एसेबां गुदुं जाखो बिथाङा सोमो नांदोंमोन। गामाखालि बिथाङा दैखौ बेबादि गुदुं जानाय मोनदांफेराखैमोन। बिथाङा दैसायाव दुगैनो हायाखिसै।
बिथाङा खौरां मोनदोंमोनदि बे साननैसोनि गेजेराव बिदुं दुंखावनाया जोबोद बारा जादों । ओनसोलाव गोबां मानसिफोरनि लोमजानाय आरो थैनायनि खौरां खोनानो मोनदों।
गिदिंनानै फैफिननाय समाव बिथाङा लामा सेराव थानाय नखरनि सासे सुबुंखौ फांसे बिफांनि सिङाव मोजाङै उन्दुबाय थानाय नुदोंमोन। बिथाङा खाथियाव फैदोंमोन आरो बिफांनि सिङाव दान्दिसे जिरायनानै जोबोद गोजोननाय मोनदोंमोन। बिफाङा गुसु आरो सुदेम बार एंगारदोंमोन।
बिथाङा उन्दुनानै थानाय मानसिखौ बुंदोंमोन, “दिनै बिदुङा सिगांनि साननिख्रुइबो बांसिन जादों। आं न’ सिङाव थानो हायाखिसै। दैसा गाथोनाव दुगैनो थांबाय नाथाय दैसा गाथोननि दैयाबो दिनै बेसेबांबा गुदुं जाबाय। नोंथांनि खाथियाव फैनानैसो आं जोबोद गोजोननाय मोनबाय।”
उन्दुनानै थानाय मानसिया बुंबाय, “बेफोर गासैबो बिफां -लाइफां जोबलांनायनि थाखाय जादों। अरनबारिया दिनै गामि आरो नोगोर जाबाय, नोगोराव गेदेर गेदेर दारिमिन आरो खारखाना गायसनजाबाय। सानफ्रोमबो लामा आरो नोगोरनि गोसारनाय, सान आरो हर गारि- मथर खारनाय मानो बिदुं बाङालासेनो थानो?”
मानसिया हमदांनो हादोंमोन। बिथाङा बुंदोंमोन, “फांसे बिफांनावदि एसेबां गोहो आरो गुन दं बेखौ आं मोजाङैनो बुजिनो हाबाय। दिनै नोंथाङा फांसे बिफांनि सायायावनो जोबोद मोजाङै उन्दुनानै दं। थारैनो बयबो बिफां गायनानै लायोब्ला बेनि सायायाव गोजोनै थानो हागोन।”