फरायसालिमायाव थांनो थाखाय सासे सेंग्राया सानफ्रोमबो गंसे बासखौ लामायाव नेबाय थानो गोनां जायोमोन। सम सम बासआ उन जानानै सफैयोमोन आरो बेफोर समाव बियो गोबावसिन नेनो गोनां जायोमोन।
सानसेखालि अखा बोथोरमोन। बासखौ नेनानै थानाय समावनो सेंग्राया अखा सिजादोंमोन। बिथांनि अखा सिजानायखौ नुनानै गुबुन सासे बास नेनानै थानाय सिख्लाया बास सफैनाय समसिम गावनि साथाखौ बिथांनि खर’आव दिखांनानै होदोंमोन। सानैबो अखा सिजानायनिफ्राय बारग’दोंमोन।
गोबां बोसोरनि उनाव सेंग्राया सासे जिल्ला बेंगिरि जानो हादोंमोन। बियो मावख’खौ मोजाङै सामलायनायनि अनगायैबो जिल्लानि सिङाव थानाय गामि दावबायनो थाङोमोन।
सानसेखालि बिथाङा जिल्लानि बयनिख्रुइबो साबसिन गंसे फरायसालियाव थिग फरायसालिया जागायनायनि सिगांनो दावबायनो थांनाय समाव लामा ससेयाव गोबां अखा लोगो मोनलांदोंमोन। बिथाङा फरायसालियाव सहैनानै नुदोंमोनदि गथ’फोरा बयबो साथा लानानै फरायसालियाव फैगासिनो दं।
जिल्ला बेंगिरिया सासे आइजो फोरोंगिरिखौ गावनि हौवा फोरोंगिरिखौ साथा हमना होनानै हेफाजाब होनाय नुनो मोनदोंमोन।
जिल्ला बेंगिरिया हौवा फोरोंगिरिखौ हारसिं लोगो हमनानै सोंदोंमोन, “नोंथांनोदि सासे आइजो फोरोंगिरिया साथा हमनानै होदोंमोन। बेनि सायाव मानसिफोरा जेबो बुङा नामा?”
फोरोंगिरिया बुंबाय, “जोंनि फरायसालियाव जेब्लाबो गोरोन्थिखौ आसि थुनानै होलायबाय थायो। आरो जों बेबादिनो सोदांलायबाय थायो। दिनै आं सान्दुं दुंगोन साननानै साथा लानानै फैयाखैमोन। बबेखानि लामा ससेयावसो अखाखौ लोगो मोनफैदों। जोंनि फरायसालियाव जेब्लाबो गावजोंगाव हेफाजाब होलायनाय मोनसे थासारिखौ जों बानायनानै लानो हादों। दिनै मेडामा आंखौ मदद खालामनायखौ नोंथाङा नुफैबाय। मेडामानो जोंनि गाहाइ फोरोंगिरि। बिथांनि बोसोन बादिनो जों बयबो सोलियो।”
जिल्ला बेंगिरिया गोदो गावनि फरायसा समाव मदद खालामनाय बे आइजोखौ लोगो मोनफिननानै जोबोद गोजोननाय मोनदोंमोन। बै समानो बिथांनि आरिमु जालियानि जोबथा आनजादमोन।