सासे सिखा दाग्रानि फिसाज्लाया गावनि फरायनायखौ गारनानै नआव फैफिनदोंमोन। बियो जेबो गेदेर सिमां सुजुवालासेनो बिफाया जेखौ मावनानै नखर सालायबोदों बेबादिनो मावनानै जानोसै होनना सानदोंमोन।
सानसेखालि बिफाया गावनि फिसाज्लाखौ गंसे लहानिफ्राय सिखा खंखाय दानानै महर होनो खावलायदोंमोन। बियो अराव दान्दिसे सावनानै अरखि रोहो रोहो जानाय लहाखौ देनो होदोंमोन। नाथाय फिसाज्लाया आन्दायनानै थादोंमोन। एसेबां गुदुं लहाखौ माबोरै देनांगौ बेखौ बियो गिदोंमोन आरो दान्दिसे सम गुसु जाहोनानैसो लहाखौ देदोंमोन।
बेबादिनो गले गले गुसु जानाय लहाखौ देनानै बियो सिखानि महर होनो नाजादोंमोन । नाथाय गोबाव सम नाजानायनि उनावबो बियो हायाखैमोन । बियो बे खामानिखौ जोबोद बानाय मोनदोंमोन ।
बिफाया दान्दिसे सम बिखौ नायना थानानै बुंदोंमोन, “आंदि बेसेबांबा बोसोरनिफ्राय लहा देनानै सिखानि महर होबोबाय । नोङो दासिमबो आं माबादि मावगासिनो दं बेखौ एसेबो सोलोंनानै लायाखै। बेनिख्रुइ दुखुनांथावसिन मा दंबावो?”
फिसाज्लाया सिरि गंस्रिनानै थादोंमोन। बियो दान्दिसे उनाव बुंदोंमोन, “आं सानदोंमोन, फरायनायनिख्रुइ सिखा दानाया गोरलैसिन जागोन होननानै। सिखा दानायाबो गोरलै नङा बेखौ आं दिनैसो मिथिबाय।”
बिफाया बुंबावदोंमोन, “जाय जेखौ गोसो होयो बेयो गोरलै जानानै फैयो। गोसोआव लाखि, अरखि थानाय समावनो लहाखौ देनांगौ अब्लासो सिखानि महर होनो हागोन।”