मुलुगाव जोनोम मोननाय बे जिउआ जोबोद जेथो गोनां। बेवहाय रावबो हारसिङै थांनानै थानो हाया, सोरबा हारसिंनो जुदि थांनानै दं अब्ला बिथाङा मुलुगनि सोमोन्दै जेबोखौनो मिथिया। बियो सुखु आरो दुखु मोननैनि बेसेनखौ मोजाङै बुजिया। बियो गावनि आंगो लोगो आरो गुबुननि थासारि आरो अलखदखौ मिथिरोङा।
बेवहाय दं दुखु, सुखु, दान्दिसे रंजानाय आरो दान्दिसे गाबनाय। मोननाय आरो खोमानांनाय। मानसिफोरा बेवहायनो सानफ्रोमबो बायदि रोखोमनि जेंनाफोरजों मोगा-मोगि जानांगौ जायो। जेंनाफोरजों जुजिनानै मानसिफोरा थांनानै दं। बेनो जिउनि बायदि रोखोमनि समायना बिसम्बिफोर गालाङो।
गोबावसै आं बे बुहुमाव जोनोम मोननाया। हालो-दैलो, एखमबा गाबनाय आरो एखमबा मिनिनायजों गोबां बुब्लिफोरखौ गारबोबाय आं।
सान्दुं, अखा, गोब्राब बोथोरजों सौसिबोनानै आंनि बैसोआ थामजिसे दा जाबाय। बैसोनि खोथाखौ जुदि बुङो बे बुहुमाव दासिम आं थामजिसे बोसोर थांनानै दं।
आंनि सुखु आरो दुखुनि जाहोन गासैखौबो गावनोगाव बुजिनो हाबाय। मैया नङा दिनै, दिनै नङा गाबोन आंनि जेननाय आरो देरहानायनि जाहोन गासैखौबो आं बुजिनो हादों।
दासिमबो आं बुजिनो हायासै, मोनथावैखौ मानो एसेबां मोननो हास्थायफ्लाङो? बेनि जाहोना मा, आरो बेनि फिथाइया मा जागोन?
माबा मोनसे सिमां, माबा मोनसे आसा जायखौ सुखु आरो गोजोन होनना बुंनाय जायो, जानांगौ बेनो हास्थायनायखौ सोमजिहोयो।
दिनैसिम ओरैनो मोनथावैखौ हास्थायनानै जेबो मोनाखै, मोननांगौ जेबो गैया। मोनथावैखौ हास्थायनानै माब्लाबाबो मोननो हाया।
आं दिनै गावनियावनो आर’ज खालामो, जाहाथे मोनथावैखौ आरोबाव मोननो हास्थायफ्लाङा बेनि थाखाय गोसोखौ सामलाय। गोसोखौ बुं, गोसो नों दिदोम जा, गोख्रों जा। गावनि खामानियाव गोसो हो। जेब्लाबो जाथावनानि थाखाय नांथाब। गोसो नों दिदोम आरो गोख्रों जा।