बर’ सावथुनफोरनि मादाव दासान्दि B Boys आ बानायनाय ‘सान्दुम’ मुंनि सावथुनखौ बयखौबो नायनो थाखाय हांखुर जानायखौ नुनो मोनदों। बर’ सावथुननि जौगानाया सोलिफुदों , आरो बेबादि समाव गोदान दाहारनि मोनसे मख’जाथाव सावथुना जादों सान्दुम।
गोबां मानसिफोरा सान्दुमनि ओंथिखौ नायगिरनानै बर’ थुनलाइ आफादनि दिहुननाय ‘बर’ हिन्दी इंराजि सोदोब बिहुं’खौ बोदलादोंमोन। बेवहाय लिरनाय दं “दसेनि थाखाय सानखौ फांथेनाय बिलाइफोर।”
बि बयसआ गिबियाव सासे युटुबारमोन । नखरनि माखासे जेंना थानायनि थाखाय गावनि फरायनायखौ बियो उन्दै समावनो नागारदोंमोन आरो युटुबार जानो थाखाय सिगांदोंमोन।
बिथाङा गिबियाव फाल्थु खालामनानै गोजोननाय मोनोमोनब्लाबो बिथांनि भिडिअफोरा मानसिफोरनो आलादा रोखोमनि गोजोननायखौ होनो हादोंमोन। बिथाङा मानसिफोरनि अनसायनाय आरो बाखोनायनायखौ मोननो हादोंमोन। बयनिबो थुलुंगा आरो अनसायनाय मोननानै बिथाङा गोख्रैनो सासे युटुबार णहरै जौगानो हादोंमोन। भिडिअनि थाखाय बिथाङा हिन्दी रावखौ बाहायदोंमोन।
बिथाङा गोबां जायगाफोराव दावबायदोंमोन, गावनि साहसजों गोब्राब दिन्थिफुंदोंमोन, बेबादिनो खम बैसोआवनो गोबां रोंगौथिफोर आरजिना लादोंमोन।
बिथांनि युटुब सेनेलआ आथिखालाव नैजिद’ लाख साबस्क्रिबार दं , आरो बिथांनि दानारि आरजिनाया खमैबो 1 लाखनिफ्राय 2 लाखनि गेजेराव जायो।
माखासे समाव बि बयसआ गोदान बोसोर आरो रंजानाय फोरबोखौ लानानै मोसानाय भिडिअ आरो गुसुं भिडिफोर मोननैसो बानायदोंमोन।
बे बोसोराव बिथाङा दोंसे आबुं बर’ सावथुन बानायदों। सिगांनिफ्राय बि बयसआ मा मावगासिनो दं, मा दिहुननो नागिरदों आंनो बहा थांदोंमोन सुलु लाबाय थादोंमोन। बे बोसोराव बिथांनि सावथुनखौ नायनो थाखाय बयबो हांखुर जानानै दंमोन।
बि बयसनि सान्दुम सावथुनखौ तामुलफुर जिल्लानि सुख्लाइ सेन्ट्रेल स्टेडियामाव बेखेवनाय जादोंमोन। रोजा रोजा मानसिफोरा बे सावथुनखौ नायनानै थाखाय जमा जाफैदोंमोन।
आलासि महरै मुंदांखा बर’ सावथुननि फावखुंगुर आरो फावखुंग्रिफोरखौ बेवहाय हांख्राइनाय जादोंमोन जेरै- हेलेना दैमारि, रिंखि ब्रह्म, बर’ सावथुन महरगिरि गौथुमनि आफादगिरि दिपक कुमार रामसियारि आरो ओनसोलनि राजखान्थिगिरि गनेस कसारिखौ।
गोबां बर’ आरो बर’ नङै युटुबार आरो बिथांनि फेनफोरा बेवहाय बाहागो लाफैदोंमोन।
खौरांगिरिफोरनि फोसावनाय बादियै बेवहाय बा रोजानिफ्राय स्नि रोजानि गेजेराव मानसिफोरा सावथुनखौ नायफैदोंमोन। मोनसे दिन्थिफुंनायावनो जिनिफ्राइ जिनै लाखनि गेजेराव रां बुथुमनो हादोंमोन।
सावथुन दिहुनगिरि बि बयसआ फोरमायनाय बादिब्ला बे सावथुनखौ बानायनो थाखाय जिनै लाख थिग खालामनाय जादोंमोन, नाथाय गासै खरसाया जादोंमोन ब्रैजिनिफ्राय ब्रैजिबा लाखनि गेजेराव।
बेवहाय गावनो हौवा आखु महरै गाहाइ फाव खालामदों, हिनजाव गाहाइ आखु महरै भुमिखा दैमारि। बेवहाय मुंदांखा फावखुंग्रि जुनु बसुमतारी, मस्क’ ब्रह्म आरो गोबां गोदान गोदान फावखुंगुर आरो फावखुंग्रिफोरा फाव खालामदों।
बेयो सानै गामि गोथौनि गोरिब नख’रनि कलेज फरायजेननाय सेंग्रा आरो सिख्लाफोरनि मोजां मोनलायनाय, नखरनि जेंना, गामियाव थानाय सुबुंफोरनि खोमसि फोथायनाय आरो सानै लोगोनि गोथौ सोमोन्दोनि गेजेरजों खैफोद-आफोदाव गावजोंगाव मदद होलायनायखौ लानानै बानायनाय सावथुन। बेयो मोनसे नखरनि फावथिना, एकसन, खास्रि बिस्रि जाथाय आरो दुखु गोनां सल’ थानाय सावथुन। बेवहाय रजनिकान्त बरदलैनि लिरनाय सल’मा ‘मिरि जिवरि’ जाय 1894 मायथाइयाव ओंखारदोंमोन बेनि एसे साया नुनो मोनो आरो टाइ सावथुन तनि जानि ‘तुम युं गुं’ नि एसे साया नुनो मोनो। (Sandum is a family drama action romantic film directed and produced by B Boys. The film scripted loosely based on the love story of the first Assamese novel Miri Jiyori written by Rajanikanta Bordoloi and the action style of the Thai martial arts movie Tom-Yum-Goong starred by Tony Zaa.)
सावथुननि सल’: दिङाया उन्दै समावनो बिमा आरो बिफा थैजायो। बिफाया गान गायोमोन नाथाय फैसा मोनैनि गावनि हा-हुखौ फाननानै जौ लोनानै थैलांदोंमोन। बिबैयासो बिखौ खाङो आरो जोथोन लायो। बेबादिनो बिसोरो बिबै आरो फिसौ गोजोनै थायो, सम सम एदावलायनानै बिसोरो समफोरखौ बारहोयो। दिङा आरो अलंबार सानै गामि गोथौनि फरायफुनाय लोगो। बिसोरो सानैजोंनो जेब्लाबो साइकेल सालायनानै कलेजाव थाङो। गावजोंगाव जेब्लाबो मदद होलायो। गामिनि दुब्लियाव आरो दैसा गाथोनाव बिसोरो बोरसिजों ना बोनो, बाथा सायो, बाथुल लानानै दाउसिन गावो आरो माब्लाबा बिसोरो सोरनिबा बारिनिफ्राय रैमालि फिथाइ खावनानै जायो।
फैसालि आरो बोहैथिया बिसोरनि गामिनिनो मोनसे थाखोआवनो फरायनाय सिख्लाफोर। बिसोरनि नखराव जोबोद गोरिब। फैसालिनि नखरा आरोबाव बांसिन गोरिब। उन्दै समावनो बियो बिमा थैजायो, बिफाया सानफ्रोमबो जौ लोङो, बियो बिसि गदाय हाबा खालामफिनो। उन्दै समाव बोहैथिया बिमा गदायनि फिसाज्ला उन्दैखौ दैयाव गबनायाव रैखा खालामनो हायाखैमोन। बियो गावनि लोगोफोरजों दुब्लियाव ना गुरनो आरो मैगं खानो थाङो।
दिङाया फैसालिनि फारसे मोजां मोनदोंमोन। बियो जेब्लाबो बिखौ नोजोर लाखिदोंमोन । गोनांथि जानाय बादियै मदद खालामदोंमोन । फरायसालियाव बिसोरो सम सम जयैनो थाङो आरो जयैनो फैफिनोमोन। माब्लाबा साइकेल गाज्रि जानाय समाव दिङाया बिखौ साइकेलाव दिखांनानै नसिम दोनबोयोमोन।
बिमाया फैसालिखौ मोजां नोजोरै नायामोन। बियो जेब्लाबो बिखौ गाज्रि नोजोरै नायदोंमोन, नखरनि खामानिखौ मावहोदोंमोन, मोजाङै लिरनो आरो फरायनो थाखाय खाबुबो होआखैमोन।
मोनसे समाव बिफाया गोब्राब लोमजानायलाय रांनि जेंनायाव गोग्लैनानै बिसोरो फैसालिखौ गुबुन सासे माहाजोन मानसिनिफ्राय रां लानानै फिसाज्लानो हाबा हरदोंमोन। नाथाय खाफाल गाज्रि सेंग्राया हाबानि सिगांनो गावनि लोगोफोरजों द्रागस जाहोनानै बुथारजादोंमोन ।
जाथायखौ जेबो गुदि-खिथा मिथियैनि थाखाय नखरनि मानसिफोरा फैसालिनि सायाव गाज्रि सनदेह’ खालामो। बिखौ बुथारनारनि दाय होयो। ‘दायना’ होनना बुङो आरो साजा होनानै नसिम दोनफैफिनो। बिसोरो गावसोरनि गासै रांखौ बिफिनो, आरो थाबैनो हरनो हायाब्ला नखरखौ फोजोबस्रांनो थाखाय हुमखि होयो।
फैसालि बिमा आरो बिफाया हरफिननो थाखाय जेबो राहा गैयै जायो। माखासे सम फैसालिया नआवनो थादोंमोन, बयजोंबो गाज्रि मोनजादोंमोन, गावनि आंगो लोगोफोराबो बिखौ गाज्रि मोनदोंमोन आरो बिनि सायाव गाज्रि आखु दिन्थिदोंमोन। बिसोरखौ रावबो मदद होनो थाखाय सिगां फारसे दावगाबोआखैमोन।
फैसालिनि बिमा आरो बिफाया जेबो राहा गैयै जानानै थादोंमोन । सानसेखालि बिमाया सासे मानसिनिफ्राय आरोबाव रां लानानै उन्दुनो थाखाय हगारो, नाथाय बिखौ फैसालिया लावथिजों खर’आव बुयो, बेवहायनो लेमा गोग्लैनानै नखौ अरा खामो आरो बै मानसिया अरजों खामथारजायो।
बेबादिनो गामिनि मानसिफोरा फैसालिखौ बुथारनो थाखाय नागिरदोंमोन नाथाय दिङाया बिखौ रैखा खालामो। बिखौ दोनखोमानो नाजायो। मानसिफोरा जेब्लाबो फैसालिखौ बुथारनो थाखाय नागिरबाय थायो । फैसालिया बिबायारि जानानै जेराव-मेरावनो गिदिंबायनो हमो आरो बयजोंबो मुगैजायो।
जोबथारनायाव फैसालिखौ मोनसे जायगायाव लानानै थाङो। बिखौ साजा होयो। दिङा बिबैखौबो लानानै थाङो आरो बिखौ बुथारो। दिङानो बे खौरांखौ बिनि लोगो अलंबारा फोरमायदोंमोन, लोगो लोगोनो दिङाया बै जायगासिम सहैयो आरो बिसोरजों मोगा-मोगि जायो।
दिङाया गावनि सुथुरफोरखौ फोजोबस्रांनो हायो नाथाय बियो गावनि बिबै आरो फैसालिखौ बिसोरनिफ्राय रैखा खालामनो हायाखिसै।
सावथुननि अनसायजानाय: गोबां नायगिरिबा सावथुनखौ जोबोद मोजां मोननाय फोरमायदों, बिजिरफोरा फाव खालामनाय, सल’, बिथोन होनाय, एकसन बायदिफोरखौ जोबोद मोजां जादों होनना सावरायदों।
मुंदांखा फावखुंगुर फैला जे बरगयारिया बेखौ बर’ सावथुननि ‘सनाथि मुगानि जागायजेननाय’ होनना गावनि फेसबुकआव लिरदों।
गोबां नायगिरफोरा बि बयसखौ मुंदांखा मारटियेल आर्टिस टनि जाजों रुजुनायखौ नुनो मोनदों। फावखुंग्रि भुमिखा दैमारिखौ खोला भारतनि फावखुंग्रि साग फाललाबिजों रुजुनायखौ नुनो मोनदों। थामहिनबा बिखौ ‘बडलेण्ड फाल्लाबि’ होनना बुंदों।
गु साननि गेजेराव बे सावथुना गासै 1.17 कौटि रां आरजिनो हादों।
आथिखालाव बे सावथुनखौ नायनो थाखाय बयबो हांखुर जानायखौ नुनो मोनदों। मोनफ्रोमबो दिन्थिफुंनायाव रोजा रोजा मानसिफोरा नायनो थाखाय फैदोंमोन।
दासिम बे सावथुनखौ गोबां जायगाफोराव दिन्थिफुंनाय जादों ।