जोंनि गामिनि सोरगिदिं गोबां बिफां-लाइफां आरो बेनदोंफोर सानथ्रहायै मोननो हायो। गामिनि मानसिफोरा गोबां बिफां-लाइफांफोरनि बिलाइ, फिथाइ, बिबार, बेदर आरो बेनदोंफोरखौ थांनानै थानाय समाव देहाखौ गोख्रोङै लाखिनो थाखाय आदार हिसाबै संनानै जायो। बेफोरखौ मानसिफोरा मैगं हिसाबै बाहायो एबा गनायनानै लायो। दैमा-दैसा, बारि-बागान आरो हाग्राबारिनिफ्राय गोबां बायदि रोखोमनि मैगंफोरखौ गोबां रोखोमै आदार हिसाबै जानाय जायो। एवनानै जानाय, रुनानै एबा संनानै जानाय, बाथोन एबा देग्लिनानै जानाय बेफोरनो मानसिफोरनि जुथि गोनां खाजा।
गोदो गोदायनिफ्रायनो जों आदार हिसाबै सानफ्रोमबो बाहायबोनाय मैगं-मैलाफोरखौ गाहायै दैमा-दैसा आरो बोरि मोननैबो जायगायावनो मोननो हायो। गोबां मैगंआनो गावबागाव मोनफा जुनिया गुन थानायखौ नुनो मोनो। गोबां मैगंफोरानो गोबां सवादनि जायो जेरै- गोखा, गोफा, गोदै आरो गोखै।
फै जों आरोबाव मैगंफोरनि सोमोन्दै गुबुन गुबुन आयदानि सायाव सोनारनानै नायबिजिरनानै दिहुननि-
गामिनि आबादारिफोरा मैगंफोरखौ गावसोरनि न’नि सोरगिदिं थानाय आबाद दुब्लि आरो बायदि रोखोमनि आदब बाहायनानै बारियाव आबाद खालामो। जानो थाखाय बांसिन मैगंखौनो आबाद खालामोब्लाबो आथिखालाव बाजाराव फाननायनि थांखियैबो आबाद खालामनाय नुनो मोनो। आबादारिफोरा मावनाय मैगंखौ गाहायै मोननै बोथोराव मोननो हायो- दैज्लां बोथोराव मोननाय मैगं आरो मेसें बोथोराव मोननाय मैगं।
दैज्लां बोथोराव मोननाय मैगंफोर: बे बोथोराव मोननाय माखासे मैगंफोरा जादों- जोगोनार, खुमब्रा, फोरला, मैथा, फानथाव, सबाय बिमा, बिन्दि बायदि बायदि।
मेसें बोथोराव मोननाय मैगंफोरा जादों: लाइ, लाफा, मुला, आलु, गोबां जाथोनि खफि बायदि बायदि।
जों सानफ्रोमबो ओंख्रि हिसाबै बाहायनाय मैगंफोरखौ गाहायै माखासे बाहागोआव मोननो हायो जेरै- बिबार मैगं, फिथाइ मैगं, बिलाइ मैगं, बिफां एबा बेनदों मैगं, बेगर मैगं ।
बिबार मैगंफोरनि मादाव दं- मैथ्रु बिबार, जोगोनार बिबार, फोरला बिबार, खारौ खान्दाय बिबार, फुल खफि बायदि बायदि।
फिथाइ मैगं- जोगोनार, थाइबें, फथल, गरसि, खुमब्रा, फान्थाव, फोरला, जिंखा, लाव, सबाय बिमा, खुन्थाइनारा बायदि बायदि।
बिलाइ मैगं- लाइ, लाफा, मुला, अन्थाइ बाजाब, जोगोलावरि, जारि, खफि थोब, बेसर बायदि बायदि।
बिफां एबा बेन्दों मैगं- जोगोनार बिजौ, खुमब्रा बिजौ, फोरला बिजौ, थाइनासि, खिफि बेन्दों, मान्दे, सिब्रु, आजोनाय, दिंखिया, मेथखा, मानिमुनि बायदि बायदि।
बेगर मैगं- दालि, सबाय, खान्थाल बेगर बायदि बायदि।
गोबां मैगंफोरनि आखुथाइफोरा आलादा आलादा जायो। बेबादिनो खायसे मैगंफोरा जानो गोखा, खायसे, इनायनो गोखै, खायसे गोफा, खायसेया गोदै जायो।
माबादि मैगंफोरा गोखै मिथिगौदा? खुमब्रा, मैथा, थाइगिर बेफोरबादि मैगंफोरा जानो गोखै। सरानस्रायै गामिनि सुबुंफोरा गोखै मैगंखौ सान्दुं गोसायाव जायोब्ला जोबोद साबसिन होननानै बुङो।
माबादि मैगंफोरा गोदै मिथिगौदा? जोगोनाद, मदुमफुल, फोरला बायदि मैगंफोरा जानो गोदै जायो।
माबादि मैगंफोरा गोखा जायो मिथिगौदा? खायला, उदासि, खुन्थाइनारा, नार्जि बेफोरबादि मैगंफोरा जानो गोखा जायो।
माबादि बिफांनि फिथाइफोरनि बेगरफोरखौ ओंख्रि जायो मिथिगौदा? खान्थाल बेगर, खख्लिं बेगर, सबाय, मथरदालि बायदि बायदि।
माबादि बिफां लाइफांफोरनि बिजौ आरो बिलाइखौ ओंख्रि जायो मिथिगौदा? दिंखिया, खेरादाफिनि, मैथा बिलाइ, लाव बिजौ, जोगोनाद बिजौ, खुमब्रा बिजौ, थाइबें बिलाइ गोरलै, लाइ, लाफा, मुला, खिफि बेन्दों, मानिमुनि, जारि बायदि बायदि।
माबादि बिबारफोरखौ बाथोन जायो फिथिगौदा? मुदुमफुल बिबार, खारौ खान्दाय, लाइ बिबार, मुला बिबार।
माबादि लाइफांफोरनि बेदरफोरखौ ओंख्रि जायो मिथिगौदा? थास’, थारुन, आलु, मुला, थागान्दा, गाजर, अलदर बायदि बायदि।