जोंनि बुहुमाव बायदि रोखोमनि समायना नुथायफोर दं आरो बेफोरखौ नायनानै जों जोबोद गोजोननाय मोनो। समायना मुवाफोरा जोंखौ गोजोन होयो।
बुहुमा जेरै समायना बेबादिनो बेयो गोमोथाव आरो जोबोरैनो जेथो गोनांबो। बेवहाय बायदि रोखोमनि खैफोद-आफोद, जाथाय, जेंनाफोरा जोबनो थाङा। गोबां मुगानिफ्रायनो बे बुहुमाव बायदि रोखोमनि जाथायफोरा सोलिबोबाय थादों। बुहुमनि हा दाथाय महरा सोलाय- सोल’ जाबोबाय थादों।
मानसिफोरा बुहुमनि हा दाथायफोरनि सायावनो थांनानै दं। सोरबा हायेनाव, सोरबा हाजोआव, सोरबा बालाहामायाव, सोरबा लैथो गेजेराव आरो सोरबा अरनबारियाव थांनानै दं। थांनानै थानो थाखाय मानसिफोरा बायदिसिना जेंना आरो खैफोदफोरजों जुजिगासिनो दं।
मानसिफोरखौ मिथिंगानि जाथायफोरा सम सम हालाय-हाफाय खालामबोदों। दुखु होदों, सोगाबदों आरो माब्लाबा बिसोरनि न’-बां, दोहोन- दौलद, आगो लोगोफोरखौ फोजोबस्रांदों।
दिनैनि समाव मिथिंगानि खैफोदफोराल’ नङा, मानसिफोरा गावजोंगाव दुखु मोनलायो, मानसिफोरनि हाबा मावनाय आरो बाथ्रा बुंनायफोरा गुबुन खाथिनि मानसिफोरखौ दुखु होयो। मानसिफोरा गावजोंगाव मोनसा-मोनसि जायो, मेगन सालायो, माखौबा लानानै सुथुर जालायो। गावजोंगाव खिथिर होखारलायो। मानसिफोरा बुजिनाय आरो साननायनि गोरोन्थियावनो गावजोंगाव दुखु मोनो आरो दुखु होलायो।
सुबुंनि जिउआव दुखुआ फैयो आरो थाङो, नाथाय जेब्लाबो दुखु जानानै थानो नाङा। जोंनि जिउआनो दान्दिसे दुखु आरो सुखु। जोंनि थांनानै थानायाबो बेबादिनो बबे समाव मा जागोन बुंसनो हाया। बेनिखायनो सुखुनि समाव रंजानो सोलोंनांगौ। गावनि मावनांगौ खामानिखौ मावलांबाय थानांगौ। जिउआव गोब्राब जेंना फैगोन, गाज्रि थासारिजों जुजिनो नांगोन। बेबादिनो गावखौ खुसियै लाखिनो नांगोन।
आसोल बाथ्राया जादों, जों खुसियै थानांगौ आरो गुबुन बयखौबो खुसियै थानो होनांगौ।