मोनसे गेदेर सहराव सासे फाग्लाया सानफ्रोमबो गिदिंबाय थादोंमोन। बिथाङा सोर, बबेनि, माबोरै बेबादि जादों बिखौ रावबो सोङामोन। बिथाङा बबेयाव थायो बेखौबो मानसिफोरा जेबो उदिस लायामोन।
सानसेखालि सासे दोहोनि सेंग्राया बिथांनि खाथियाव फैदोंमोन। बिथांनो रोजासे रां होनानै सोंदोंमोन, “नोंथाङा बबेनि? नोंथांनि मुङा मा अननानै आंनो फोरमाय?”
बे फाग्ला मानसिया बिथांनि मोखाङाव गल’ नायदोंमोन। बिथाङा माब्लाबाबो बेबादि रावजोंबो बबेनि आरो मा मुं होनना सोंजाफेराखैमोन। बिथाङा दोहोनि सेंग्रानि सिगाङाव फिननाय होफिनदोंमोन, “आं बबे जायगानि आरो मा मुं मोननैबो सोंथिनि फिननायखौ होनो हानाय नङा। अननानै आंखौ गाज्रि दामोन।”
दोहोनि सेंग्राया आरोबाव बिथांनि मुं आरो थंखौ मिथिनो लुबैयाखैमोन। नाथाय बिथाङा आरोबाव सोंथि खालामदोंमोन, “नोंथाङा मानो गावखौ फाग्ला खालामदों? फाग्ला जानानै नोंथाङा माबाफोर मुलाम्फा मोनदों नामा?”
फाग्लाया बुंदोंमोन, “आंनि दुखु आरो दाहाखौ नोंथाङा मा बुजिनो? मानसिफोरा खालि गावसोरनि खोथाखौल’सो सानो। आंबादि जायोब्लासो नोंथाङा बुजिगौमोन।”
बिथांनि बाथ्राखौ खोनानानै दोहोनि सेंग्राया मिनिस्लु जादोंमोन आरो गोख्रैयै सोंदोंमोन, “बुंनायसाय, नोंथांनि दुखुआ मा?”
फाग्लाया बुंदोंमोन, “मोनसे समाव आं सासे सिख्लाखौ मोजां मोनदोंमोन। आंनि गोसो गोरबो गासैखौबो आं बिनो होदोंमोन। नाथाय मोनसे समाव बियो आंखौ नागारलांदोंमोन। बिखौ बावनो हायै आरो दुखुजोंनो आं फाग्ला जानायखौनो साबसिन जासिगोन होनना थांखि लादोंमोन।”
दोहोनि सेंग्राया मिनिनानै बुंदोंमोन, “नोंथाङा मुलुगनि बयनिख्रुइबो आदुवासिन मानसि। सासे सिख्लाजों नागारजानायनि थाखायनो नोङो गावनि गेदेर सिमां आरो थांखिखौ खोमानानै लाबाय। नोंथाङा दा गावनिल’ खोथा साननानै फाग्ला जानानै दं। नोंथांबादि आंबो सासे सिख्लाजों मोजां मोनलायदोंमोन। आंबो आंनि गोसोथोनायजों नागारजादोंमोन। नाथाय नोंथांबादि आं फाग्ला जानो थाखाय थांखि लायाखैमोन। आं मुलुगनि मानसिफोरखौ आरो मुलुगखौ मुगैनो हाया। आं गावखौ दोहोनि जागोन आरो बयनिख्रुइबो साबसिन सुखु आरो गोजोनै थागोन होनना थांखि लादोंमोन। सोरजोंबा नेवसि जायोब्ला उनथिं दाफावसाय, जोबस्रांनायनि खोथा दासान, गावखौ दुखुआव दादोन, नाथाय सुखु आरो गोजोनै थागोन होनना थांखि ला।”
बिथाङा बुंबावदोंमोन, “दाबो आं नोंखौ मदद खालामनो हागोन, जुदि नोंथाङा गोजोनै थानो थाखाय आरो सुबुं समाजनि थाखाय हाबा मावगोन होनना सानो। साननानै नाय, मुलुगाव सोरजोंबा नेवसिजानाय मानसिया नोंल’ नङा।”
फाग्लानि गोसोआ सोलायदोंमोन। बियो सानदोंमोन, “मुलुगाव सोरजोंबा नेवजानाय मानसिया आंल’ नङा।”