मोनसे नोगोरमायाव सासे गेदेर फालांगिरि दंमोन। नोगोरनि मादाव बिथाङा बयनिख्रुइबो दोहोनिसिनमोन। बिथाङा सान आरो हर गोबां खोस्थो खालामनानै गावनि फालांगिखौ खालामदोंमोन।
बिथांहा गंसे जोबोद गेदेर गारि-मथरनि कम्फानि, गंसे गेदेर हटेल आरो गंसे सफिं मल दंमोन। बेफोर कम्फानिफोरनिफ्रायनो बिथांनि गासै आरजिनाया फैयोमोन।
बिथाङा गावनि कम्फानिनि थाखाय गावनि साबसिन सोलोंथाइ गोनां मावदांसाफोरखौ थिसनदोंमोन। नेमखान्थिफोरखौ मानि हानाय आब्रुथि गोनां मानसिफोरखौसो बिथाङा कम्फानिनि बिथोनगिरि खालामदोंमोन।
बिथांखौ नोगोरनि गोबां फालांगिरिफोरा मेगन सादोंमोन। बिथांनि कम्फानिखौ माबोरैबा फोजोबस्रांनो हागोन बेनि थाखाय गाज्रि सोलो बाहायबाय थादोंमोन। बिथांनि कम्फानिनि मावदांसाफोरा बायदि रोखोमनि जेंनाफोरजों गले गले मोगा-मोगि जानांगौ जाबाय थादोंमोन। कम्पानि सालायनायाव सामलायगिरिफोरा जेंना मोनबाय थादोंमोन।
बिथांनि फिसाज्ला गेदेरानो सफिं मलनि गाहाइ दैदेनगिरिमोन। सानसेखालि फिसाज्लाया बिथांखौ बुंदोंमोन, “आफा जोंनि कम्फानियाव बायदिसिना जेंनाफोरा नुजागासिनो दं। नोंनि गेदेर बदनाम नोगोराव गोसारबाय थादों। जों सफिं मल कम्पानि सालायनायखौ बन्द’ खालामनायानो मोजां जासिगोन नामा?”
बिथाङा फिसाज्लाखौ गावनि खाथियाव जिराय होनानै बुंदोंमोन, “मानसिफोरा मेगन सानानै बायदि रोखोमनि मुं सुयो। बिसोरो नोंखौ गावसोरनि साबसिन जानायखौ लुबैयाखै। गोसोआव लाखि, मानसिफोरा गावनि साबसिनखौसो मेगन सायो। नागारनायनि सिगां मोजाङै सान, गोसोखौ हमथा, जुजि आरो साबसिन जानो थाखाय साहस खालाम। जेंनाफोरा फैयो आरो थाङो, जेंना खालामग्राफोराबो जोबथारनायाव जेनो।”