सा-सानजा भारतनि रायजोफोरनि सोमोन्दै

आथिखालाव सा-सानजा भारतआव गासै गं दाइन रायजोफोर दं। बिसोरखौ स्नि बिब’-बिनानाव आरो सासे फंबाय होनना मिथिनाय जायो। बेफोर रायजोफोरा गासै 5,400 किल’ मिटार गुबुन गुबुन हादोरफोरजों हादोर गेजेरारि सिमा खालामदों जेरै- चीन हादोर, म्यानमार, भुटान, नेपाल आरो बांलादेश।

सा-सानजा भारतआ गुबुन गुबुन हारि आरो हारिसाफोरनि थाग्रा जायगा जायनि थाखाय हारिमुनि फोथाराव बेयो जोबोद दोहोनि। 200 निबो बांसिन राव, गुबुन गुबुन फोलेरनि सुबुं, दोरों आरो बायदि रोखोमनि समायना फोरबोफोर बेवहाय नुनो मोनो।

गाहायाव सा-सानजा भारतनि रायजोफोरनि फारिलाइखौ होनाय जाबाय –

फारि नं	रायजोनि मुं	राजथावनि	हाखालि
1	अरुनाचल प्रदेश	इतानगर	83,743 बर्ग किल’ मिटार
2	आसाम	दिसपुर	78,438 बर्ग किल’ मिटार
3	मेघालय	सिलं	22,429 बर्ग किल’ मिटार
4	नागालेण्ड	कहिमा	16,579 बर्ग किल’ मिटार
5	मनिपुर	इमफल	22,327 बर्ग किल’ मिटार
6	मिज’राम	आइजल	21,081 बर्ग किल’ मिटार
7	त्रिपुरा	आगरतला	10,491 बर्ग किल’ मिटार
8	सिकिम	गेंटक	7,096 बर्ग किल’ मिटार

बबे रायजोखौ आरोबाव मा होनना मिथिनाय जायो फै जों मिथिनानै लानि-

• सुबुं अनजिमानि बेलायाव देरसिन नोगोरमाया जादों आसामनि गौहाटी नोगोरमा।
• सुबुं अनजिमानि बेलायाव नैथि देरसिन नोगोरमाया जादों त्रिपुरानि राजथावनि आगरतला।
• सुबुं अनजिमानि बेलायाव थामथि देरसिन नोगोरमाया जादों मनिपुरनि राजथावनि इमफल।
• सा-सानजा भारतनि गासै रायजोफोरनि मादाव मेघालय रायजोखौ बयनिख्रुइबो गोरिबसिन रायजो होनना मिथिनाय जायो।
• सिकिम रायजोनि सरें मुंनि जिल्लायानो जादों सा-सानजा भारतनि बयनिख्रुइबो फिसासिन जिल्ला। बेनि हाखालिया गासै 293 बर्ग किल’ मिटारल’।
• सा-सानजा भारतनि गेजेराव गौहाटी नोगोरमायानो जादों बयनिख्रुइबो दोहोनिसिन नोगोरमा।
• सिकिम आरो मिज’राम रायजोखौनो दावबायग्राफोरनि थाखाय गिनांगौ गैसिनै रायजो होनना मिथिनाय जायो। बेवहाय सिखाव आरो दाखायफोरनि अनजिमाया जोबोद खम आरो रायजोफोरनि सुबुंफोरा दावबायग्राफोरखौ जोबोद सनमान होनायखौ नुनो मोनो।

मेघालय

• मेघालय रायजोखौ जोमैनि रायजो होनना मिथिनाय जायो।
• बुहुमनि बांसिन अखा हाग्रा जायगा मौसिनरामा मेघालय रायजोनि सिङावनो दं।
• मेघालय रायजोनि सिङाव थानाय मावलिं मुंनि गामिया एसिया हादोरमानि मादावनो बयनिख्रुइबो साब-सिनखोनसिन गामि होनना मिथिजायो।
• दंफांनि रोदा आरो औवाफोरजों बानायनाय ओनसोलनि सुबुंफोरा बानायनाय दालांफोरा जोबोद मुंदांखा जाय दावबायारिफोरनि गोसोखौ गोजोन होनो हायो।

आसाम

• आसामखौ सा-सानजा भारतनि हाबलांग्रा होनना मिथिनाय जायो।
• आसामा थसे गं गोनां गान्दा, बुरलुंबुथुर दैमा आरो साहा आबादनि थाखाय दुलाराय बुहुमावनो मुंदांखा।
• माजुलिया जादों बुहुमनि मादावनो बयनिख्रुइबो देरसिन दैमायाव थानाय दिप।
• काजिरंगा माहारियारि हाग्रामाया भारतनि मादावनो थसे गं गोनां गान्दानि थाखाय मुंदांखा।

अरुनाचल प्रदेश

• अरुनाचल प्रदेशआ जादों भारतनि बयनिख्रुइबो गेसेंसिन सुबुं अनजिमा थानाय रायजो।
• अरुनाचल प्रदेशआव थानाय टावां, सेला पास आरो मादुरि लेक बेफोर भारतनि मादावनो मुंदांखा दावबायदिं मेरु।
• अरुनाचल प्रदेशआव थानाय सेरगाव मुंनि जायगाया आफेल फिथाइनि आबादनि थाखाय मुंदांखा।
• बे रायजोखौ सान ओंखारनाय हामा होनना मिथिनाय जायो।

मनिपुर

• मनिपुर रायजोआव थानाय लकटक मुंनि बिलोमाया भारतनि बिलोमाफोरनि मादावनो मुंदांखा बिलोमा।