मोनसे फरायसालियाव सासे सोदोमस्रि मुंनि फरायसुलि दंमोन। बियो जेब्लाबो गावनि लोगोफोरजों गोसो खुसियै थायोमोन। बिसोरनि गेजेराव गावजोंगाव अनज्लायनाय आरो मदद होलायनाय दंमोन। गोनांथि बादियै बिसोरो गावजोंगाव मुवाफोरखौ रानज्लायोमोन। बेबादिनो बिसोरो गोबां बोसोर गंसे फरायसालियावनो फरायदोंमोन आरो बिसोरनि सोमोन्दोआ गाहामैनो सोलिबाय थादोंमोन।
सानसेखालि गोदान सासे फरायसुलिया मुं थिसनफैदोंमोन। बिनि मुङा हांमास्रिमोन। बियो जोबोद सियान आरो गोरों फरायसामोन।
सोद्रोमस्रिया जोबोद नोरोम आरो गुरै आखुनि फरायसामोन। हांमास्रिमोनहा नखराव जोबोद दोहोनिमोन। बियो सोदोमस्रिजों बिजों लोगो जानो नाजादोंमोन। बेबादिनो बिसोरो सानैजों लोगो जादोंमोन। हांमास्रिया सोमस्रिखौ गावसोरनि नआव गले गले आलासि जानो लांदोंमोन। गोबां बाथ्राफोरखौ सानैजों सावरायलायदोंमोन।
लासैनो सोदोमस्रिया गावनि गोजाम लोगोफोरखौ बावगारलांदोंमोन। बियो गावनि गोजाम लोगोफोरजों लोगो जानायखौ खम खालामदोंमोन। बिनि गोजाम लोगोफोरा बिजों लोगो जानो थाखाय साहस मोनै जादोंमोन। बेबादिनो बिसोरो गोजान जालांदोंमोन।
सोदोमस्रिया सिगांनि बादि जानानै थायाखै। बिनि गाननाय-जोमनाय, बिनि थानाय, रायज्लायनाय आरो साननाय गासैबो सोलायलांबाय थादोंमोन। बियो गावखौनो जोबोद माहाजोन फिसाबादि आखु दिन्थिदोंमोन।
जोबथारनायाव हांमास्रिया सोदोमस्रिखौ नागारनानै गुबुन फरायसालियाव फरायहैदोंमोन। सोदोमस्रिया बे समाव गावखौनो जोबोद आख’-फाख’ मोनदोंमोन। बियो गावनि गोजाम लोगोफोरजों लोगो जाफिननो थाखाय लाजिनाय मोनदोंमोन। बियो बिसोरो गावनि माबोरै गोजान जालांदोंमोन बेखौ बुजिसनो हायाखैमोन।
सानसेखालि बियो बिमानियाव सोंदोंमोन, “आइयै, आङो गोबां सोलायथारबाय नामा? आंनि लोगोफोरा दा आंनि गोजान जालांबाय। बिसोरो आंजों लोगो जाया, आरो आंबो बिसोरजों लोगो जानो हायाखै।”
बे समाव बिमाया बुंदोंमोन, “सोरबा सासे गोदान लोगो हाबसनफैनायावनो माब्लाबा गोजाम लोगोफोरा गोजान जालाङो। बेयो मानसिफोरनि साननाय, थानाय-जानाय आरो सोलिनायनि फारागथिनि थाखाय जायो। बेनि गेजेरजों माखासे आखल-आखुफोरा रोखायै बेरखाङो। गोरोबलायनायाव आखल-आखु आरो साननायनि खोथाया फैयो।”