सानसेखालि सासे आबादारिया मोनसे अरनबारियाव बन दाननो थांदोंमोन। बै सानखालि बियो मानै उखैहाबनाय सेसा फिसा मोनना बिसोरखौ गावनि नआव लानानै फैदोंमोन। सेसा फिसाफोरा उखैनायजों जोबोद लोरबां जालांदोंमोन।
गिबियाव आबादारिया गांसो होनानै सेसा फिसाफोरखौ फोथांनो नाजादोंमोन। सेसा फिसाफोरा गांसो जानो हायाखैमोन बेनिखायनो आबादारिया बिसोरनि थाखाय गावनि आबाद दुब्लियाव गाजरनि आबाद खालामदोंमोन।
गाजरफोरखौ आबादारिया सेसा फिसाफोरनो गोसोबादि जानो होदोंमोन। सेसा फिसाफोरा गाजर जानानै गोख्रों जादोंमोन, गोख्रों आरो गुफुं जादोंमोन। बिसोरो थाबैनो देरबोनो हमदोंमोन।
आबादारिया सेसा थानो थाखाय गावनि आबाद दुब्लियावनो फिसा न’ बानायनानै होदोंमोन। गाव थानो थाखायबो सेरावनो बियो गंसे समायना न’ लुदोंमोन। बियो सेसाफोरजोंनो गेलेदोंमोन, बेबादिनो गोबां सानफोरखौ खुसियै बारहोदोंमोन।
सेसाखौ जानो थाखाय अरनबारिनिफ्राय गले गले मासे सियालआ फैबाय थादोंमोन। नाथाय आबादारिया बिसोरखौ होसोहरदोंमोन आरो सेसाफोरखौ रैखाथि होदोंमोन।
सानसेखालि आबादारिया गोसा सानदुंआव आबाद मावनानै जोबोद मेंनाय मोनदोंमोन। बियो गावनि मेंनायखौ होखारनो थाखाय फांसे बिफां सायायाव दान्दिसे उन्दुनानै थादोंमोन। बे समावनो मासे बिस गोनां जिबौआ बिनि खाथियाव फैदोंमोन।
गावसोरनि बिगोमाखौ जिबौआ सौथारसिगोन साननानै सेसाया गोख्रैनो बिथांनि खाथियाव खारबोनानै बिखौ फोजादोंमोन। बेबादिनो आबादारिया बिस गोनां जिबौनिफ्राय जिउ रैखा मोनदोंमोन।