गंसे हाथाइयाव सासे आइजो दखानदार दंमोन। बियो सानफ्रोमबो फुंनि स्नि रिंगायाव न’निफ्राय नै किलोमिटार थेला नारनानै दखानखौ जागायजेनोमोन। मोनाबिलिनि बा रिंगायाव बियो गावनि दखानखौ फाङोमोन आरो न’ फारसे गिदिंलांफिनोमोन। बेबादिनो बियो ननि खामानिखौ मावोमोन।
आइजोआ सासे फिसाज्ला दंमोन। बियो गामिनि गुदि फरायसालियावनो फरायोमोन। माखासे बोसोर सिगां बिनि फिसाइया गंसे मथरजों सौग्रावनानै थाबायनो हायै जादोंमोन। बेबादिनो बेंगुरा जानानै थादोंमोन।
आइजोआ सानफ्रोमबो गावनि मावनो गोनां खामानिखौ मावबाय थादोंमोन। नखरनि गोनांथि जानाय मुवाफोरखौ बुथुमनानै लादोंमोन। मोनसे समाव बिनि फिसाज्लाया सासे फुलिस साख्रि मावदोंमोन। नखरा साबसिन- हामसिन जाबोदोंमोन नाथाय आइजोआ गावनि खामानिखौ नागाराखैमोन।
सानसेखालि सासे मानसिया आइजोनि खाथियाव फैनानै सोंदोंमोन, “नोंनि फिसाज्लाया साख्रि मावबाय, नोंखौ बियो नाया नामा? बियो नोंसोरखौ मदद खालामा नामा? नखराव साख्रि मावनाय मानसि थानानैबो नोङो बेबादि खामानिखौ मानो मावबाय थाबावनो? नोंहा दा जिरायनानै थानायनि सम जाबाय।”
बे समाव आइजोआ फिननाय होदोंमोन, “आं दा रां आरजिनायनि थाखाय आंनि खामानिखौ मावाखै। गिबियाव आं आंनि फिसाज्लानि थाखाय जाग्रा मुवा बानायोमोन, बियो साख्रि मोनबाय, दा आं फरायसाफोरनि थाखाय बानायो। आं गथ’फोरखौ मोजां मोनो, बिसोरनि थाखाय आं जाग्रा मुवा बानायो। खाथियावनो गंथामसो फरायसालि दं, फरायसालिनि। गथ’फोरा आंनि जाग्रा मुवाफोरखौ जानानै थाङो। बिसोरनि थाखायनो आं आंनि दखानखौ दासिमबो बन्द’ खालामनो हायाखै।”