अन्थाइ, सोर, दंफां, हा आरो गोबां मुवा-बेसादफोरा गिलिर। बेफोरखौनो दैखांनानै मानसिफोरा गावसोरनि खामानिखौ मावफुङो आरो गावसोर लुबैनायबादिनो मोनसे थासारि सोरजिनानै लायो।
नाथाय मानसिनि गोसोआव गोबां साननाय फैयो । माब्लाबा जोबोद मोजां साननाय, माब्लाबा जोबोद गाज्रि साननाय। बांसिन समावनो मानसिफोरा गुलाय-गुजाय साननायजों गावनोगाव बुगिनांगौ जायो। गावनि साननायजों बुंनो थाङोब्ला बांसिन सुबुंफोरानो सोरांजेननाय समनिफ्राइनो नारानाथा जुजिनांगौ जायो।
मानसिया जोबोद साहसि जिब । अरननि राजा सिंह आरो बयनिख्रुइबो बोलोगोरासिन मैदेराबो सोलो गोरों मानसिखौ नेरनानै एबा होख्रावनानै हान्थु सोमावनो हाया । गोसो जायोब्ला मानसिया गुलि गरसे गावगारगासेनो एबा जिलिद गंसे हगारगासेनो गुबुन गिलुबालु जुनारफोरखौबो दुब्ला दोननो हायो।
दैबानायाव गोजावबोनाय अन्थाइ, हाखर सिङाव जावखांनानै मोननाय अन्थाइ आरो हाजोनि अन्थाइफोरखौ लाबोनानै मानसिया सनानि न’ लुनानै लायो । अन्थाइजों हाब्रु आरो हाद्रि जानो हायै मोजां लामा बानायनानै लानो हायो। मानसिफोरा हाखौ सोलो बाहायनानै इथानि महर होयो आरो न’-बां लुयो । बेफोर मानसिनि थाखाय जेबो गिलिर नङा।
नाथाय मानसिया होबथानानै दोनजायो गावनि साननायजोंनो। मानसिनि गुलाय-गुजाय जोबोद लिरथाइ गोनां सानस्रिफोरा दावगानो एबा सिखारनो हायै खालामो। माखौबा सानफ्लाङोबा जेबो खामानिखौनो मावनो गोसो जायै जायो एबा बायो । थारैनो साननायनि दारैनो गोबां खामानिया मावफुं जायो बेबादिनो गरन्थ गैयै साननायनि दारैनो खामानिया गोग्लैसोनानैबो थायो। बुंनो थाङोब्ला नोंनि साननायनि लिरथाइनिख्रुइ जेबोआनो नोंखौ होसिननानै दोननो हाया।