गोरिब नखरनि सासे लेखा गोरों सेंग्राया साख्रिनि थाखाय गले गले आनजाद लिरदोंमोन। बिथाङा खेबसेबो उथ्रिनो हायाखैमोन। गोबां खेब नाजानायनि उनावबो बिथाङा साख्रिखौ मोननो हायाखैमोन।
बिथांनि बिफाया बिथांखौ सानसेखालि सोंखारिना बुंदोंमोन, “जों नोंखौ फेदेरबोबाय आरो फोरोंबोबाय। नोंखौ लेखा फोरोंनायावनो जोंहा गोबां रांखावरि खरसा जालांबाय। नोंबो गोरों जाबाय, नाथाय दिनैसिमबो नोङो मानो साख्रि मोनाखिसै? दानिया नोङो जोंखौ माबोरै जाहोगोन?”
सेंग्राया दिखार नांदोंमोन। बियो सानना जेबो राहाखौनो नुहराखैमोन। माबोरै रां आरजिगोन आरो गावनि बिमा-बिफाखौ माबोरै नायफिनगोन सानसनो हायाखैमोन।
सेंग्राया सानसेखालि गावनि सासे लोगोखौ लोगो हमना बुंदोंमोन, “जों सानैजों सिखाव खावनायखौनो सोलोंनोसै। सिखाव खावनानै गोबां रां आरजिगोन। माखासे फेग्रा मुवाफोर जेरै – द्रागस , सिगारेट आरो जौ लाबोनानै मानसिफोरनो स्रोद स्रोद फानखोमानोसै।”
बिथांनि लोगोआ बुंदोंमोन, “नोङो गावखौनो गाज्रि जानो साननाय, गोग्लैसोनो साननाय आरो गोमालांनो साननायखौ नागार । बे समा नोंनि साबसिन जानो नाजानायनिसो सम । नोंथाङा साख्रि मोनैनि थाखाय गावखौ गाज्रि लामाजों दैदेननो नागिरदों, बेयो गेदेरथार गोरोन्थि। नोङो दा मोजाङै फालांगि खालामनायखौनो जागायजेनदो आं नोंखौ मदद खालामगोन।”
सेंग्राया बुजिनो हादोंमोनदि, बांद्राय आबेगिग जानानै हरखाब गाज्रि थांखि लानाया गोरोन्थि। सहायनायजों थार लामाखौ सायखनायासो साबसिन। जिउआ गोग्लैसोनाय एबा गोमालांनो साननायनि थाखाय नङा।