अहिंसा आरो माहारिनि बिफा महात्मा गान्धी

महात्मा गान्धीया मुलुगाव ओरैबादि मोनसे जारिमिन सोरजिलांबाय जाय जारिमिना दिनै सारा मुलुगावनो मानसिनि थांनानै थानायाव फरायनो गोनांथार मोनसे आयदा जानानै थाबाय। अहिंसा एबा हिंसा खालामैया बिथांनि मुलुगावनो होलांनाय देरसिन आरो साबसिन मोन्थोर। अहिंसा मोनथोरखौ गोरबोजों बोजबना लानानै इनाय अनागारजों जुजिनानैनो बिथाङा मुलुगाव सासे गेदेमा हिसाबै देरहासार आरो जाफुंसार सुबुं जानो हादों। सोमावसारनाय समाव अहिंसायानो बिथांनि देरसिन आरो साबसिन हाथियारमोन।

इं 1869 मायथाइनि 2 अक्टबरआव महात्मा गान्धीया जोनोम जादोंमोन दानि गुजरात रायजोनि परबन्दर होननाय मोनसे जायगायाव। बिथांनि उनदै समनि मुङा करमचंद गान्धीमोन। बिथांनि हाबा मावनाय, गोहो आरो जोबनो गैयै गुन-गियानखौ नुनानै मुलुग खन्थाइगिरि आरो एचिया हादोरमानि मादावनो बयनिख्रुइबो सिगांसिन नबेल बान्था मोननो हानाय रबिन्द्रनाथ ठाकुरआ ‘महात्मा’ होननानै गाबज्रिदोंमोन। बेनि दिनैनि समाव करमचंद गान्धीनि साबसिन बिमुं जानानै थानायसै। बोराय बैसोआव बिथांखौ भारतनि सुबुंफोरा मान होनाय आरो सिबिनायजों ‘बाफु’ होननानै गाबज्रिदोंमोन।

महात्मा गान्धीया उनदै समनिफ्राइनो जोबोद सांग्रां आरो गियानि मानसिखामोन। गोसो हमथानो हानाय आरो सुबुंखौ मान होनाय आरो रायदावनाय आखुफोरा उनदै समनिफ्राइ बिहा दंमोन। उनदै समनिफ्राइनो बियो खाथि खालायाव इंराजफोरजों बायदि जाहोनाव नाङा-फाङा नासयजानाय आरो बिसोरनि माखासे गाज्रि आखुथाइफोरखौ नुनानै गोसोजों गोसो गाबखांदोंमोन।
गावनि फरायनायखौ फोजोबनायनि उनाव बिथाङा भारत हादोराव थाद’नाय गैयै गोख्रों सोमावसारनायखौ जुरिदोंमोन जाय सोमावसारनाया हादोरनि देरसिन आरो साबसिन सोमावसारनायमोन बेनो जाबाय उदांस्रि सोमावसारनाय। बे सोमावसारनाया मोनबो इनाय एबा गाज्रि रोखोमै सोमावसारनाय नङामोन। बेयो हादोराव जोनोम मोननाय नंगुबै सुबुंफोरनि गावसोरनि मोन्थाइनि थाखाय सोमावसारनायमोन। गोलाव बोसोर जाफैनायनि असिलायैनो इंराजफोरा भारत हादोरखौ गावसोरनि गोसोबादि खुंनो लादोंमोन। भारतनि सरासनस्रा सुबुंफोरखौ बिसोर बान्दाल’ खालामना बाहायाखैमोन बबेखानि खास्रि-बिस्रि गोबां समावनो इनाय अनागार खालामनाबो बुथारदोंमोन। बैसोर जिउ नागारनांनाय सुबुंफोरनि दुखु आरो बिग्रायखांनाया महात्मा गान्धीनि गोरबोआव नांदोंमोन।

इं 1947 मायथाइनि 15 आगस्टखालि भारत हादोरा उदांस्रि मोनदोंमोन इंराजफोरनि बेंनायनिफ्राइ। उदांस्रि मोननानै भारत हादोरा बोसोरसे जास्लाबैयावनो महात्मा गान्धीया भारत हादोर आरो बे बुहुमखौ नागारनांगौ जायो नाथुराम गदसेनि नायगार नायगार गुलि गावनायाव। आथिखालाव महात्मा गान्धीनि हाबा मावनाय, बोसोन, बिबुंथि आरो लिरनायफोरा थांनानै थानाय सुबुंफोरनि थाखाय सोलोंनो गोनां जानानै थाबाय।

महात्मा गान्धीनि दैदेननायावनो उदांस्रि मोननाय भारत हादोरा गोदान लामाजों आगान सुरबाय। बेयो दा मुलुगनि मादाव दावगाफुनाय गंसे हादोर। बेनि हा, दै, बार, राव, राजखान्थि, रांखान्थि, हारिमु, दोहोरोम गासै मिथिंगा बेसेबांबा गोमोथाव। गोमोथावनि गेजेरावनो गोजोननायनि सिमा गैया भारत हादोराव। गोदान भारतआव महात्मा गान्धीखौ ‘माहारिनि बिफा’ होननानै गाबज्रिनाय जायो। मानोना बिथांनि हाबा मावनाया हारि, दोहोरोम आरो राव जेबो बासियालासेनो गासै भारतनि खौसे सुबुंफोरनि थाखायनोमोन।

गेदेमा नेताजी सुबास चन्द्र बसआ माहारिनि बिफा बे बिमुंखौ महात्मा गान्धीनो होदोंमोन। माहारिनि बिफा महात्मा गान्धीखौ मान होनानै थांनाय इं 2007 मायथाइनि 15 जुनखालि राष्ट्र संघनि सावराय मेलआव 2 अक्टबर थामहिनबा महात्मा गान्धीनि जोनोम सानखौ ‘मुलुगनां अहिंसा सान’ हिसाबै फालिनांगौ होननानै थांखि लायो। बेबादिनो बै साननिफ्राइ दिनैसिम मुलुगनां अहिंसा सान हिसाबै गासै मुलुगावनो फालिनायखौ नुनो मोनबोदों। बेनि गेजेरजों सुबुंफोरनि गेजेराव अहिंसा आरो सुबुं समाजनि गेजेराव गोजोन आरो खौसेथिनि गोनांथिनि फारसे गोनांथि होनायखौ नुनो मोनदों।

दिनैनि सानाव मुलुगनि खना खनला जेरावबो मुलुगनां अहिंसा सानखौ फालिनानै बिबुंथि होनाय आरो माखासे जिउ दानायाव गोनां जानाय हाबाफारि लानाया बेसेबांबा गोजोनथाव जादों। मुलुगाव गोजोन आरो खौसेथि गायसननोब्ला थारैनो मुलुगनि साफ्रोमबो सुबुंनि गोरबोआव अहिंसानि मोन्थोर सोनानै होनाया जोबोरैनो गोनांथार। बेखौनो महात्मा गान्धीया गाव थांनानै थानाय समाव सुबुं माहारिखौ फोरोंदोंमोन। इयुनावबो जाहाथे रावबो बावनानै थाङा बिनि थाखाय सोलोंनो गोनां जानानै थानांगोन साननायजों बिथाङा लिरनानै गालांदोंमोन।

‘अहिंसा एबा हिंसा खालामैयानो साबसिन दोहोरोम’ बे बाथ्राखौ लानानै महात्मा गान्धी बिथाङा मुलुगनि गासै सुबुंफोरनि थाखाय हाबा मावलांदोंमोन। दिनैनि सुबुंफोराबो बे बाथ्राखौनो गोसोआव लाखिनानै हाबा मावनो दावगाबोनांगोन। गावनि जौगानायनि थाखाय हाबा मावनायाव जाहाथे रावनिबो हिंसा एबा बेरेखा जाया बेखौ सायख’नानै लानांगोन। गावजोंगाव अनज्लायनाय, बयनिबो गेजेराव खौसेथि आरो गोजोन गायसननायनि बाथ्राखौ साननानै हादोर आरो सुबुं समाजनि खामानि मावनो थाखाय दावगाबोनांगोन।